BD0 – WTS Un Combinacion Perfecto

Dialuna 8 di mei 2017 a tuma lugar e acto ceremonial di firmamento entre WTS y BDO International.

Pa WTS tabata presente sra. Cari Wolter, sr. Frank Snijders y sr. Jamil Tromp y BDO International a wordo representa dor di sr. Martin van Roekel, CEO.

Tambe sr. Jeannot Evers Partner den accountancy di BDO Hulanda a acompaña nan p’e ocasion.

 

Durante e ceremonia sra. Cari Wolter ta splica cu den e ultimo 10 añanan, WTS a crece y transforma su mes den un di e companianan mas dinamico y renombra den e ramo di “belasting, accountany & advisory” na Aruba.

Esaki ta danki na tur nos cliente nan p’e gran apoyo y confiansa deposita den nos, y e dedicacion continuo di nos coleganan. Pa cual motibo nos ta supremamente agradeci.

 

“Den un mundo asina dinamico y cu tanto cambio, y den cual desaroyo nan riba mercado local y internacional ta tuma lugar asina liher, a pone nos evalua nos strategia di compania.

Un evaluacion cu meta principal pa hiba nos n’e siguiente fase di evolucion di nos organisacion pa sigi garantisa mihor servicio.

Ta p’e motibo aki y cu inmenso placer y honor nos ta anuncia cu WTS a haya e licencia exclusivo pa opera como BDO na Aruba ” asina sra. Cari Wolter a enfatisa.

 

BDO mundialmente ta den e top compania nan mas grandi den e ramo di “belasting, advisory & accountancy”. BDO tin presencia den 158 pais y un staff di 67.700 profesional dedica trahando den mas cu 1.400 oficina rond mundo.

BDO ta conoci pa su enfoke personal pa cu empresanan chikito y mediano. BDO no ta impone reglanan riba su miembronan, nos strategia ta pa respeta e cultura local di maneho di negoshi den cada pais y pa stimula e partnernan pa tuma decision strategico basa riba merito specifico di e mercado local”, asina sr. Martin van Roekel a remarca.

 

P’e motibonan aki WTS a tuma e decision di uni forza cu BDO, combinando di e forma aki “lo mihor di dos mundo” pa ofrece Aruba y tur cliente di WTS e mihor experiencia den servicio.

Sr. Jamil Tromp ta elabora: “ Nos ta firmemente convenci cu BDO pa nos ta un paso esencial pa ofrece mas inovacion y eficiencia cu servicio di calidad superior pa nos clientenan y manteniendo nos toke personal pa cual WTS a resalta semper riba mercado, dunando servicio de calidad halto.

E dedicacion y compromiso cu WTS ta conoci pe serca su clientenan lo keda manteni” asina el a conclui.

 

WTS a “rebrand” recientemente den BDO-WTS y ta celebra e acto aki, awe tardi diamars 9 di mei.

E celebracion aki lo ta conhunto cu coleganan, clientela y otro invitadonan.

Su Exelencia Gobernador di Aruba sr. Alfonso Boekhoudt lo honra BDO-WTS cu su presencia y alabes lo inaugura oficialmente e edificio nobo situa na L.G Smith Boulevard #26.

Un edificio iconico, historico den Oranjestad modernisa y renoba di un forma “Eco friendly”, unda su interior ta decora cu “artwork” di Aruba su fauna, flora y edificio nan monumental y historico.

P’e apertura di e edificio nobo nos ta informa cu e caminda lo ta bay ta sera diamars 9 di mei for di e crusada di Adriaan Lacle BLVD te n’e crusada di Schumannstraat di 3pm te cu 11pm.

 

Top