Bianca Peters: “Hunto cu stakeholders, nos kier haci di Oranjestad un oferta y experiencia mas amplio”

 

Oficina di Inovacion cu ta resorta bou di Ministerio di Asunto General, Ciencia, Inovacion, Desaroyo Duradero, Sector Primario y Cultura, ta cla pa ricibi tur esnan cu ta kere cu hunto por traha pa haci di Oranjestad, e siguiente Soho of Wynwood.

Su director, Bianca Peters, ta na cabes di un ekipo di mentenan creativo cu hopi boluntad pa haci di nos centro di ciudad un destinacion mundial cu ta ofrece hopi mas cu djis compras.

 

Na final di e presentacion duna pa Goldman Properties y cu a tuma lugar algun dia atras na sede di Oficina di Inovacion, mayoria di esnan presente a bisa cu nan ta dispuesto pa haci di e obhetivo aki un realidad; algo cu ta entusiasma nan hopi.

Entre nan tabatin ehecutivonan bancario, inversionista, comerciante y tambe artista. Situa na Kruisweg den curason di Caya Grandi, Oficina di Inovacion ta bon posicion pa ricibi tur esnan interesa den forma parti di e esfuersonan, mantene un bista cerca di e desaroyonan y ta den contacto continuo cu tur stakeholder.

 

Peters a splica cu Gobierno di Aruba a inverti masha hopi durante ultimo añanan den e renobacion di centro di ciudad, incluyendo Caya Grandi, Plaza Daniel Leo y henter e becindario; cual algun proyecto relacion cu esey, ta actualmente den ehecucion.

Adicional n’e enfoke riba infrastructura, dos aña pasa Gabinete Mike Eman II a firma na Miamia un MOU cu Goldman Properties.

E compania aki t’esun responsabel pa revitalisacion di barionan na Merca cu awe ta masha popular y bishita manera Soho na New York y Wynwood na Miami.

 

“Nan ta hopi bon den combina arte, cultura y historia cu e DNA di un cierto becindario y esey ta loke nos ta desea di mira sosode na Aruba tambe,” asina Bianca Peters a bisa.

“A desaroya Caya Grandi masha bunita cu cayanan nobo, pero tin otro sector cu por desaroya mas ainda; y no solamente desaroya pero hunto sinta pensa kico mas nos por haci na Oranjestad.”

Gobierno ta di pensa cu e funcion como centro di compras ta sumamente importante, pero mester percura tambe pa por ofrece na local y bishitantenan otro tipo di experiencianan.

Ta papia aki di restaurant, tayernan di arte, galerianan, etc.

 

E proximo paso den e esfuersonan aki ta cuminsa forma e contacto cu tur esnan cu ta kere den e vision aki y cuminsa traha riba acuerdonan concreto. Con pa hinca mas bida den centro di ciudad, con pa trece propietarionan di edificio y empresarionan nobo hunto den sociedadnan beneficioso pa ambos.

Esnan cu kier haya sa mas di e movimiento aki y/of ta interesa pa forma parti di dje, por tuma contacto cu Oficina di Inovacion mandando un email na info@bi.aw of yamando 588-7075. Asina por sinta hunto y wak con por aporta n’e revitalisacion y creatividad cu por inyecta den Oranjestad.

Leave a Reply

Top