Bike Tour di empleadonan di Arubus tabata un exito

Diasabra ultimo, den un ambiente masha ameno a tuma luga un Bike Tour caminda mas cu 30 empleado di Arubus a topa pa 6’or di mainta na Arubus Sabana Blanco y pa 6:30am a sali rumbo pa Arashi.

Mester bisa cu e ambiente cu tabata reina entre empleadonan ta uno masha special y sumamente agradabel.

Pa tur presente e sorpresa agradabel tabata ora e Director sr. Teo Croes a presenta p’asina hunto cu e demas empleadonan participa na e Bike Tour aki.

Mester bisa cu a sali for di Sabana Blanco caminda bou guia di Polis, a tuma caminda grandi bay direccion Busstation Oranjestad, caminda a para pa sosega 5 minuut. A sigui direccion Arashi via e low rise hotelnan. Mas o menos pa 7:30am a yega Arashi caminda a keda combersa, bebe algo y come fruta.

Aki nos por a scucha nos Director sumamente contento y orguyoso bisa cu esaki ta e prome di e hopi nan cu lo sigui y caminda e compania ta motiva pa tuma un direccion pa promove mas salud pa nos empleadonan.

Mester splica cu algun luna pasa a cuminsa un proyecto caminda a acerca algun compania cu ta bende Mountain Bikes y aki a yega na acuerdo pa tur empleado por a yega na un Mountain Bike.

Mester menciona cu esaki tabata un exito rotundo caminda hopi empleado a sa di haci uzo di e oportunidad aki. For di e momento aki a lanta un pasion entre empleadonan pa por cuminsa core bais hunto y pa e motibo aki a yega na e prome Bike Tour cual a tuma luga diasabra ultimo.

A keda palabra cu esaki lo keda ripiti y lo purba pa tur luna por tin mas di esakinan.

Arubus kier a gradici na prome luga tur empleado cu a participa na esaki y haci e Bike Tour aki un exito rotundo, tambe no por keda sin gradici sr. Eddie Maduro di Cuerpo Policial cu a coopera cu esaki, tambe kier a gradici Tribike Aruba y Radio Shack cua a coopera en grande cu e proyecto di Mountain Bike di nos compania.

Arubus awor lo promove mas movecion y salud pa tur nos empleadonan.

Top