Bin celebra Dia di Himno y Bandera na Museum of Industry na San Nicolas

Dia 18 di maart lo tin un gran evento na Museum of Industry pa celebra hunto cu pueblo di Aruba nos Dia Nacional di Himno y Bandera. E evento aki ta wordo combina cu e di 4 edicion di e conocido Experience San Nicolas.

Riba e dia aki, lo tin diferente actividad pa henter famia por bin gosa na Sunrise City. E evento lo cuminsa for di 12or di merdia y lo sigi te cu 6or di atardi.

Por drenta conoce e museo pa solamente 1 florin y pa 1 florin extra por participa pa gana diferente premio atractivo durante e evento.

 

N’e parti pafo lo tin diferente tent cu ta bende cuminda crioyo, cos dushi, bebida y acesorio. Un tent di artesania, den man di Espacio Azul, tambe lo ta presente durante evento pa tur cu kier pasa wak y cumpra arte.

E celebracion aki lo cuminsa cu un parti folklorico cu musica di caha di orgel y e grupo Danza Aruba lo duna un bunita presentacion di e bailenan di Wals, Danza y Tumba.

DJ Vito Geerman tambe lo ta presente pa entretene e publico cu bon musica durante henter e evento.

 

Mas atardi, Galloway Jr. y Blacky lo pone tremendo ambiente na San Nicolas cu nan hits di Carnaval “The Purge” y “Slip and Slide”, pa despues e grupo di hobennan activo di Royal Dream Foundation presenta nan baile Carnavalesco. Ta clausura Dia di Himno y Bandera na museo sacando e delaster 3 premionan mas atractivo di e raffle.

Fuera di e Museum of Industry, Community Museum, cu ta situa net banda di CMB, tambe lo ta habri pa publico pa solamente 1 florin di 12:00pm pa 6:00pm.

Esnan cu ta desea di come un dushi cuminda crioyo tambe por haci esaki’kinan. Ademas, Teresita Center tambe lo tin diferente tent cu cuminda y bebida y tambe nan lo zorg pa tin entretenimento pa tur e publico presente for di 10or di mainta te cu 6or di atardi.

 

Manager di Museum of Industry y Community Museum, sra. Rosetna Martinus, ta invita henter pueblo di Aruba pa bin celebra Dia di Himno y Bandera na Sunrise City, unda lo celebra e dia aki na grandi.

Leave a Reply

Top