Bishita di Agregado Comercial di Embahada Canades

Recientemente Departamento di Relacion Exterior a ricibi bishita di sra. Ada Luz Rodriguez, kende t’e Agregado Comercial (Senior Trade Commisioner) nobo na Embahada di Canada na Caracas, Venezuela. Esaki ta alabez e prome bishita di sra. Rodriguez na Aruba.

 

Departmento di Relacionnan  Exterior a organisa un programa pa sra. Rodriguez cu a inclui un reunion di introduccion y orientacion cu Director sr. Edwin Abath, sigui pa un encuentro cu sra. Lucia White y sr. Frank Hoevertsz, representantenan di Free Zone Aruba NV y Utilities Aruba NV, respectivamente.

Presente tambe tabata sr. Johannes Vervloed, Consehero di Relacion Exterior.

 

Durante di e encuentro a trata topiconan manera desaroyo sostenibel, como tambe oportunidadnan existente riba tereno comercial.

Otro tema interesante tabata Smart Community, cu ta den pleno ehecucion. Sra. Rodriguez a mustra masha interes den e proyecto aki, indicando cu tin hopi compania Canades cu amplio conocemento den e area di ‘construccion berde’ y cu sigur lo tin interes pa participa den dicho proyecto.

 

E funcion di Aruba como “hub” tambe ta di masha interes pa Canada. Lo sigui explora oportunidadnan, conhuntamente cu companianan Hulandes y companianan den area di FreeZone, pa usa Aruba como un hub comercial den region di Caribe.

Di parti di FreeZone NV, lo analisa cua di e top-sectornan di Aruba lo por cuadra mihor cu e interes di companianan Canades p’asina establece contactonan pa futuro.

 

Na final di e encuentro, sr. Hoevertsz a extende atrabez di sra. Rodriguez, un invitacion na compania y institucionnan Canades pa atende e proximo conferencia di “Green Aruba”, cu ta programa pa tuma lugar na luna di november 2017.

Top