BON DIA YEN DI ALEGRIA!

Dialuna dia 27 di maart, tabata Dia Internacional di Teatro y aki na Aruba tambe a celebra esaki cu algun obranan bunita den Cas di Cultura. Nos tur ta actor y actrisnan rib’e esenario “BIDA” ya cu tur hende ta pasa den situacionnan bon y menos bon y ta expresa e emocionnan alegre of tristo. Un ta mas expresivo cu otro, pero ta tur hende ta sinti y biba nan bida lo miho posibel den nan bon comportacion y actuacion hopi biaha a la natural, sin mucho exageracion.

 

Nos a bishita hopi di nos dushi hendenan recientemente y a haya nan apoyo total pa Lady Ruth su “One woman show”, “Alegria di Ruthy”, cu lo tuma luga dia 24 di mei venidero pa 8’or di anochi den Cas di Cultura. Un show di poema, canto y baile, prepara y hinca den otro cu hopi amor y cariño. Nos musiconan: Albert, Mario, Jerry y Tino lo ta en bibo cu nan talentonan rib’e esenario.

Di e forma bunita aki Lady Ruth lo ta celebrando su 44 aña den farandula, na drempel di cumpli su di 60 aña di edad. E show “Alegria di Ruthy” lo ta hopi leuk y inspirativo cu su dushi alegria. Nos sponsornan grandi cu ta Unoca y Aruba Bank tambe ta kere den nos como un poeta y artista multifacetico y ta p’esey nos gradicimento di nos curason pa nan confiansa deposita den nos.

 

Durante e dianan, simannan nos dilanti nos lo sigui bishita instancianan radial p’asina pueblo di Aruba total por tende den tur skina e informacionnan tocante e show aki, di cual fondo recauda kitando e gastonan chikito cu falta pa kita, lo bay pa Fundacion Hende Muhe den dificultad, pa nan por drecha nan cushina. Asina nos ta duna bek na comunidad. E carchinan ta costa unicamente Afl.15,- pa persona y ta na venta na Cas di Cultura, Boekhandel Van Dorp na Dakota y na Aruba Post na San Nicolas, na Botica Sta. Anna den curason di Noord, na Grand Tropical Café na Seaport Market Place, na Beauty Salon Loly den Quaststraat y tambe na La Moderna situa den caya principal den centro di Oranjestad, cerca nos gran amigo Benjie, conoci como e cas di Chipi chipi. Danki na nos Broadcasting Queen Erin Croes y Magic fm, pa e bunita entrevista realisa dialuna ultimo, habriendo nos siman bunita cu algo dushi y positivo.

 

Erin Croes a papia bunita y a comparti cosnan berdad y bon di su carera den radio difusion y su bida personal den e conferencia di hende muhe dia 8 di maart ultimo den Renaissance Convention Center. Tremendo Maestra di Ceremonia semper, ki bunita el a papia y presenta e programa e anochi di e inauguracion di Plaza Padu dia 17 di maart ultimo, un anochi super pero super bunita mes! Nos bishita na Hit’94 tambe tabata hopi agradabel, sinti nos mes na cas cerca Johnny Habibe y Avice Winklaar, cu semper porta y curason habri pa Lady Ruth.

Eynan nos sa bay regularmente pa duna informacion di actividadnan social cultural y e biaha aki, ta nos mes ta bay realisa un dushi actividad den un “One woman show” cu hopi alegria!

 

Prome cu nos Dia Nacional nos a drop in tambe di sorpresa cerca mi bon y bunita amiga Mimi na Bo Guia FM y einan nos a recita un poema. Ta asina dushi cu e contactonan t’ey, despues cu Lady Ruth a stop di tin su programa “Dushi Awasero Musical” na 2010, net prome cu Radio Kelkboom a wordo bendi. Nos ta spera cu e otro emisoranan tambe lo ricibi nos cu asina hopi positivismo y alegria.

Nos tin cu yama ainda pa un cita pa haya un chens den nan schedule asina druk. Un danki diki gordo tambe na e corantnan cu ta permitimi papia di mi “One woman show” den mi relato cu semper ta papia di otro, e biaha aki, papiando di nos mes cu hopi auto estima. Danki pa e atencion e siman aki y pasa un dushi dia yen di alegria!

Top