BON DIA YEN DI ALEGRIA!

Scuchando Canal 90 FM den oranan di mainta 8’or y mey cu nan bunita gospsel, ta inspira oyentenan sigur. Ta bunita cu tin respet pa e Siman Santo y mas ainda, ora mi a tende algun di e canticanan for di e musical “Jesus Christ Superstar” un par di dia pasa, na e mesun canal aki.

Oh asina bunita, nos a bay bek den tempo, corda cuanto biaha nos a wak e pelicula musical aki.  Berdad tin hopi competencia riba tereno di radio difusion y cada un ta unico riba nan mes.

 

Como oyente, abo por scoge bo programanan favorito na cada un di nan. Recientemente, mi tabata den progrma “Happy Hour” cu Angela na Fresh FM y na e momentonan ey mi pensamentonan ta bay te na Hulanda, nos madre Patria. Nos a lora nos Hulandes lo miho posibel. Danki pa e koffie lieve Angela y Veronica! Manera inspira, ta bishita e radio emisoranan pa asina ta mas cerca di pueblo cu mi invitacion pa Lady Ruth su “One woman show”, “Alegria di Ruthy” di cual e fondo di e carchinan na benta ta bay pa Fundacion Hende Muhe Den Dificultad, pa nan por drecha nan cushina un crenchi.

 

Tin cu bisa cu, unda cu a bay, nan ta ricibi nos cu curason habri ! Ki bunita di nan parti pa kere y apoya nos talentonan local. Tin cu bisa tambe, cu e trainingnan ta bayendo hopi pero hopi bon mes, dushi ambiente, cu harimento, pasobra despues di un di e trainingnan den Veranda Shon Johan na cas, hasta cachonan di bisiña a cuminsa blaf cu nan alegria den nos dushi naturalesa. Un harimento sin fin! Tin cu a puntra si ta un “Comedy show” e ta bay ta, e contesta ta no.

Mi no ta un “Valeriana” ta un Vale so nos tin, y e ta den reino celestial pero keto bay inspirando cu su chistenan ora bo tende nan y bo tin cu hari sin stop.

 

Lady Ruth a cuminsa hopi trempan, pa no hay’el e ta ansha y kier dedica debido tempo na tur cos cu tin cu sigui cana y draai normal. Tin cu a menciona cu lo ta hopi bunita pa personanan cu sa regala otro algo pa Pasco Grandi, regala ticket pa e show di Ruthy. Lo ta hopi leuk berdad!

Ta purba di hiba mi camara di saca potret tur caminda cu bay, pero tin biaha ta lubid’e na cas.

 

Danki lieve Aizette di Canal 90 FM pa a graba nos pa live stream of zo, ah, nos no ta compronde mucho di computers, ta nos bon amigo, un di mi yiunan sin dolor, Bryan Balijn a hinca mi Power Point Slide Show den otro na un manera super bunita mes!

Ta e intencion di laga pasa esaki prome cu e show mes “Alegria di Ruthy” cuminsa, pues banda di 7’or y mey di anochi ora cu ya por cuminsa drenta e sala grandi di Cas di Cultura.

Un chispa di algo di su 44 añanan den farandula. Lady Ruth ta bay recita, canta y baila shonnan, no ta co’i perde, hahahaha, bin maske ta pa kaweta, hahahaha!

 

Corda bin si cu un mente y curason positivo pa por absorba e show a la Ruthy. Aunke nos ta parse Jennifer Lopez y/of Sophia Lorren, nos tin nos mesun estilo den tur cos! Hahahaha.

Ban sigui celebra bida shonnan, bida ta cortico tin biaha ora e dianan ta pasa nos voorbij.

Purba di bib’e tur momento cu gradicimento y alegria y no lubida di bin sea cana of presencia nos Caminda di Cruz Bibo di y den Dakota Diabierna Santo 10’or di mainta, cuminsando na misa La Birgen di Fatima – e Pasion di Cristo na un manera mas real posibel, un obra teatral intenso y inspirativo di e gran artista di Dakota sra. Gina Nuboer y comision organisador.

 

Y pa despues por celebra Pasco Grandi di Resureccion yen di mas gradicimento y mas amor pa tur locual Christo a haci pa nos, dor di entrega su bida na e Cruz pa nos por ta salba y tin bida eterno. For di awor un Pasco Grandi di Resureccion feliz y bendiciona pa tur famia yen di alegria, sea campando of na cas. Nos ta stima nos paz.

 

Top