Bon dia yen di alegria

Campamento no a mira nos cara e aña aki. Pero ta spera cu tur cu a bay y of ta campando ainda a pasa y ta pasando bon, den harmonia y alegria cu otro. Tin cu ta sinta relaha henter dia combersa y scucha musica, otronan ta hunga domino, etc.

Mi ta kere cu ta pasobra mi a yega di campa asina hopi biaha cu scouting, cu mi no ta haya su falta. Na e edad aki, nos ta prefera un crenchi mas comfort y luho. Campamento ta keda algo super dushi y leuk y pret, etc. Spera cu e campadornan ta corda hunta sunscreen lotion pa nan no kima di mas, pasobra nada di mas no ta bon.

 

Nos a pasa e weekend di Pasco Grandi ful suave. Diabierna Santo nos a bay cana e Caminda di Cruz Bibo den mi bario Dakota tur dia. Atrobe un exito total cu participacion di hopi hende dilanti misa y despues hopi a cana e Caminda di Cruz Bibo, cu tabata algo bibo di berdad, cu emocionnan y gritonan cu ta ponebo pensa, ma ta con anto tabata di berdad añanan pasa.

Y si mi no tin hera, hasta sanger di berdad a spat ora nan tabata suta Hesus cu zweep.

E obra teatral bibo aki ta impactante. Tur cu a hunga den e obra aki a haci’el e na un manera tremendo! “Petje af” pa e homber cu a hunga pa Hesus, oh, el a hung’el e asina bon!

E curason y motor tras di e obra teatral bibo aki, sra. Gina Nuboer a bolbe hinca tur su tempo, amor y pasion den e obra cu ta toca e curasonnan rib’e dia aki, pone nos sinti mas humilde y mas gradicido cu Cristo Hesus a duna su bida pa nos por tin salbacion. E prijs cu Hesus a paga pa nos, si nos como pecadornan.

Pabien Gina, pabien actor y actrisnan, pabien pueblo di Dakota y pabien Aruba cu nos por ta hendenan di fe, paz, salbacion y speransa. Prohimonan ruman, bibando na paz cu otro cu respet pa nos mes y pa otro.

 

Diasabra tambe a bay ful suave y Diadomingo mes un cos. Pensando riba nos nietonan y demas famia leu fo’i cas. Dialuna mainta nos mes por a wak e grabacion di un di e progrmanan di Nos Mainta na TeleAruba, den cual Lady Ruth a wordo invita pa comparti su One Woman Show “Alegria di Ruthy” cu lo tuma lugar dia 24 di mei venidero pa 8’or di anochi den Cas di Cultura.  Danki na Stan Dabian di Departamento di Cultura di Aruba, cu tambe ta dunando nan apoyo y yudansa pa cu e show aki. John Fredy Montoya ta e artista cu lo decora nos stage pa nos show, hunto cu Julie di Dept. di Cultura.

Ta for di algun luna caba nos tin contacto cu e director sr. Siegfried Dumfries, kendenan tambe ta hopi entusiasma pa mira e One Woman Show di Ruthy y ta apoyando nos cu curason.

Danki DCA Directie Cultuur Aruba pa yuda nos cu boso talentoso” men power”.

Nos tabata asina entusiasma den Nos Mainta cerca Malayka cu nos a papia y sigui papia, hahahaha.

 

E mainta ey Cruz Cora tambe tabata den entrevista encuanto campamento y nan bunita trabaonan. Ora bo tende kico tur nan ta haci, bo aprecio pa nan ta sigui crece. Nan ta duna na comunidad regularmente. Y nos tambe kier sigui e bon ehempel ey, ta p’esey e fondo na ticketnan bendi ta bay pa Fundacion Hende Muhe den Dificultad. Ticketnan ta bay pa unicamente Afl. 15,- pa persona, nos invitacion di curason pa bo cumpra esun di bo na tempo cu tur trankilidad, na Boekhandel van Dorp, Cas di Cultura, Aruba Post San Nicolas, Botica Sta. Anna Noord y Grand Tropicale Café den Seaport Market Place.

 

E luna di mei ta ey mes dilanti porta…y dianan sa pasa liher. Laga nos bay ruim op nos decoracionnan di “Easter” y saca esnan di Dia di Rey, Oranje Boven pa Rey Willem Alexander!!! Ay si, sigui trece dushi ambiente den cas!!! Pasa un dushi dia yen di alegria!!!

Top