Bon dia yen di alegria- Scirbi pa Ruthy”Lady Ruth” Vrieswijk-Bergen

A goza un mundo cu nos yiunan y nietonan na Hulanda durante 3 siman, den cual Lady Ruth no tabatin tempo pa a scirbi su relato semanal, pa motibo di e dushi actividadnan hunto den famia ayanan.

E diferencia den e ora tambe ta hunga un rol. Ora ta anochi aya, ta den dia aki. Nos tabata sali keiro un crenchi pafor di Hulanda tambe, e.o. na Alemania, na unda nos a goza un mundo na Phantasia Land, tur su careichinan, specialmente e asina yama “Achtbaan” y Lady Ruth, alias Oma Lulu a bay den tres di e “Roaler Coaster”nan ey, cu ta bolter draai bo den tur direccion, subi baha cu un tremendo speed, ponebo grita bo alma haci tur rond di bo sordo pa un rato, hahahahaha.

 

Si, nos tabata un famia cu hopi alegria! Aunke e curazon a laga Aruba tristo, pa motibo di e fayecimento di mi Omo stima Mario “Joy” Bergen, na cual entiero mi casa y ami no por tabata presente, pa motibo di nos biahe cu tabata planea caba net algun dia prome cu e entiero.

Mi por a compaña famia si na hospital varios biaha, durante e enfermedad di nos Omo Joy.

Joy Bergen, na bida activo den tempo di su tempo a destaca y a sali un biaha Deportista di Aña  den e deporte di basketball y despues na grandi un tremendo umpire den baseball pa mucha.

Un excelente agente policial of ta Recherche, mi no por corda, pero el a traha hopi aña na nos hermana isla Corsou tambe den Cuerpo Policial.

Un bon hende honesto y sincero, cumplidor. Net den e siman ey, dos di mi primonan a bin di vakantie na Aruba y nan tambe a bishita y compaña famia den e ultimo momentonan duro y dificil ora mester a tuma despedida di nos Omo Joy.

Na su bunita y distinguida sra.esposa, pa nos, carinosamente yama “Chichi”, na su 4 yiunan, Guido, Luigi, Sabrina y Debra, nietonan y demas famia, nos mas sincero palabranan di condolencia y cu e amor grandi di Dios duna nos tur consuelo y alivia e dolor inmenso ey.

 

Pa Lady Ruth, Omo Joy tabata manera un “Zulu Warrior, un Zulu Chief”, pasobra el a percura semper pa su bon famia, su ehempelnan, e educacion cu el a duna nan cu asina hopi amor y disciplina y tabata lucha hopi fuerte cu su estado di salud den e ultimo par di lunanan.

Dokternan tambe ta keda hende na prome lugar y ni maske cuanto pregunta nos tambe tabatin pa nan, nos tin cu conforma y acepta cu ya Omo Joy su curpa no por a wanta mas.

Omo Joy, sigui goza awor den e Reino Celestial serca bo Creador di amor y bo angelnan y bo lo ta awor mas serca di nos curason, mente y alma.

Nos a brasa Oom Boy y Tante Gerrie pa bosonan tur na Hulanda, como un muestra di nan amor y sintimentonan cu tabata hopi cu famia na Aruba Telefonica-, principalmente cu mi tata Lucas Bergen, teniendo asina e contact hopi serca.

 

Nos yiu y nietonan na Hulanda a yena nos curason di nobo cu nan alegria tur dia. Y Lady Ruth ta sigur, cu e solo bunita cayente y radiante lo sigui sali tur dia pa nos tur atrobe. Cu bida tin cu sigui, cu cada dia siguiente tambe ta un bunita regalo di nos bon Dios. Dios ta bon. Dios semper ta bon. Nos no ta comprende tur cos tur ora, pero nos ta sigui acepta e dia nobo yen di positivismo y perseverancia pa haci tur dia nos best den tur cos pa bira un mihor hende.

 

N’e lectornan cu a haya un crenchi falta di e relatonan di Lady Ruth, nos ta “back in town” y cu hopi amor y cariño lo sigui scirbi cosnan cu por toca y inspira nos tur den bida, bida cu ta manera un biahe pa destino bek pa Dios, mientras nos ta di transito riba e mundo aki.

Pasa un dushi dia yen di alegria cu gradicimento na curason y den un of otro oracion.

Dios ta amor. Y su amor ta den cada un di nos den diferente manera, na diferente ora. Stim’E.

 

Leave a Reply

Top