Bon dia yen di alegria Scirbi pa Ruthy”Lady Ruth”Vrieswijk-Bergen

Y asina nos a drenta e luna di november, cu hopi actividad alegre yen di color. Tabatin e musical Rent, tabatin e bunita Love Festival y na fin di october riba drempel di november tabatin tambe Manic Monday den Cas di Cultura.
Chikito y grandi a celebra Halloween, bisti den nan costuumnan bunita, mahos bunita of bunita mahos. Pa spanta nan mes of pa spanta otro.

Personalmente Lady Ruth no ta gusta e celebracion di Halloween, pero ora mi a tende cu tabatin un Speelschool cu a pone como tema p’e chikitinnan bin bisti na angel, a bin un sonrisa grandi riba e cara y den e curason di Lady Ruth.
Oh, ki bunita pa scoge e tema di angel pa nos angelnan chikito. Nos ta felicita e Speelschool ey, cu ta Debby Doo Speelschool si mi no ta equiboca.
Nos por a tuma nota di e decoracionnan bunita aki aya, cu ya e tokenan di e celebracionnan pa cu fin di aña.

Hendenan canando riba Linear Park pa baha un poco peso pa por saborea nan ayaca y galiña of calacuna horna den e luna di december. E luna di november aki tin nificacion special tambe pa Lady Ruth, como cu su kerido esposo ta cumpli aña y su distinguido mayornan lo cumpli nan di 64 aña di feliz bida matrimonial.
Nos mes, esta mi casa y ami lo cumpli nos di 40 aniversario di boda den e luna di december. Pesey semper fin di aña t’asina dushi y bunita!
Naaaah, nos no por a bay goza di e musical Rent, pero nos a sinti un chispa di dje durante e Manic Monday di fin di october den Cas di Cultura.
Y pa motibonan familiar cu semper tin prioridad, lo no por bay presencia e show Mi Mundo di Ritmo y Locura dia 14 di november benidero tampoco.

Por, si bin cambio den e schedule familiar aki. Pero talbez p’e momento ey por ta no tin carchi mas obtenibel. Pero, Lady Ruth ta desea tur cu ta participa den e show ey tur clase di exito y pa “have fun” compartiendo cu e publico boso talentonan.
He, ta haya nostalgia, bay bek den tempo den e luna di mei, ora cu Lady Ruth a celebra su di 60 primavera cu su One Woman Show den su 44 añanan den farandula. Boso ta corda e bunita paraplunan toch? Hopi a goza su cancion faborito “Jambalaya”.

Recientemente mes un bunita sra.cu a topami den hospital a dunami un bunita compliment, el a reconocemi na mi stem. Laga nos haci uso di e oportunidad aki pa felicita tur e participantenan y ganadornan den e dushi programa di descubri talento “Manic Monday”, cu porcierto tin varios cambio bunita y hopi agradabel den nan.
Tabata un bunita anochi musical di Manic Monday, e publico ta sigui crece cada biaha un tiki mas.
E biaha aki e MCnan a guia e programa den e idioma Ingles, talbez pa honra e bishitantenan di e musical Rent, of esey a cuminsa asina riba e prome Manic Monday di e aña aki? Nos no por a bay e prome dos Manic Mondaynan, ta te fin di october nos por a bay. E ambiente tabata hopi dushi cu hopi alegria y e participantenan a duna tur di nan mes den cada presentacion sea di canto of di baile. Hopi leuk cu nan por a usa e stage decor di e musical Rent.

Contento di por a nota cu famia Kelkboom ta bek den e cushina bar di Cas di Cultura, pasobra nan ta t’awor e mihornan cu nan tabatin. Bon organisa, disciplina cu super bon manera. Y ora e temporada ta hecho, cu nan productonan saludabel di dabaru.
OK. Te akinan nos relato p’e siman nobo aki, cu e tradicional saludo di “Bon dia yen di alegria” pa tur nos lectornan.

Danki pa boso atencion duna di boso curason! Cu Dios sigui bendiciona nos tur riba e bunita pida baranca di diamante aki, y pone un sonrisa bunita riba tur e caranan .
Y den nos humilde curason, gradicimento pa salud, bida, alegria y sabiduria tur dia!

Leave a Reply

Top