BON DIA YEN DI ALEGRIA Skirbi pa: Ruthy “Lady Ruth” Vrieswijk-Bergen

Awe un relato un tiki bek den tempo, den nos luna cultural, nos dia nacional cu ya ta trai lomba. Lady Ruth a priminti nan cu lo comparti cu pueblo nan bunita actividad cu a tuma lugar un paar di dia prome cu nos Dia Nacional mes. Nos ta papiando di SVb, Sociale Verzekerings Bank cu ta situa na Eagle, den Vondellaan y tambe den curason di San Nicolas.

 

Tur nan empleadonan a bini hunto manera un famia grandi y yen di ambiente y alegria a celebra nos Dia Nacional na Baranca di Yerba. Nos mester a sigui e caravana di auto pa por a yega eynan, pasobra nos no por a corda ta con ta yega eynan.

Ta hopi tempo pasa, dia nos tabata activo ainda den scouting cu nos a yega di campa eynan cu e welpnan. Pero, e lugar a mustra bunita y bon cuida ketobay. E dushi celebracion di SVb a cuminsa cu un dushi lunch, cuminda crioyo, e. o. comcomber stoba cu tabata masha masha masha dushi mes!!! Danki na e chef boluntario di SVb Ruben Krozendijk, cu a splica nos, cu ta e receta di su querida mama e ta. E dia a sigui cu varios weganan pa haya sa ki sorto di blachi matanan tabata poni riba mesa, potret di cual lugar e tabata y mas potretnan y preguntanan informativo re educativo encuanto nos dushi isla.

 

Pero, e motibo mes, pakico Lady Ruth tambe tabata na Baranca di Yerba pa a celebra cu e famia grandi di SVb, bao liderasgo di e dinamico director Edwin Jacobs, kende por cierto a encarga su mes cu cierto di e weganan pa e team di empleadonan hopi alegre y positivo di SVb, tabata pa nos a para como hurado pa e grupo participante den competencia di poesia.

Despues di e weganan y un crenchi bailamento, pasobra, ora SVb tin fiesta, ta fiesta nan ta fiesta, baha tur stress di trabao y socialisa nechi cu otro cu respet. Nos a saca varios potret di e dushi momentonan alegre di nan celebracion na Baranca di Yerba. Y nos tin e nombernan ganador di e competencia den skirbi un bunita poema di nos dushi Aruba.

 

E resultado di e nombernan di e ganadornan ta manera ta sigui: Na di prome lugar Celina Tromp cu su poema “Aruba”; na di dos lugar Rene Franken cu su poema “Aroma di mi pueblo”; na di tres lugar Maritza Luydens cu “Holor di mi infancia”; na di cuater lugar Marieta Tromp cu “Dushi Aruba” y na di cinco lugar a keda Ruben Krozendijk cu “Mi isla tan admira”.

Tur e poemanan tabata super pero super bunita y tur ta ganador, pero ta un por sali como ganador maximo, y e biaha aki e ganador a resulta den persona di Celina Tromp.

 

Nos pabien na tur cu a tribi skirbi y expresa nan mes dilanti publico, aunke ta nan mesun coleganan, pero, ta tuma toch un crenchi curashi pa bisa algo di bo curason sin sa con e publico lo reacciona. Tabata un traimerdia y atardi hopi agradabel y alegre na Baranca di Yerba.

Riba Dia Nacional mes nos a topa cu algun ex coleganan lider scout patras di Cas di Cultura, despues di nan parada uniforma. Contento di por a combersa un crenchi cu John Hessen y e otro ex colega lidernan scout. Pabien un biaha mas na SVb y Scouting Aruba!!!

 

Danki pa e pasenshi pa a warda riba e relato, pero tin biaha e actividadnan y potretnan ta hopi y ta tuma un crenchi tempo tin biaha pa warda. Y tin biaha tambe “Recordar es vivir”.

Y…ainda ta sinti e biento fresco ta caricia e banderanan blauw di Aruba den nos curason, anunciando cu e strea cora ta abo tambe, cu bo amor y pasion pa bo cultura den tur su dulzura. Pasa un bon dia yen di alegria!!!

Top