BON DIA YEN DI ALEGRIA

Nos por a disfruta di varios siman tra’i otro di dushi musica jazz den Café Grand Tropical na Seaport Market Place cu “Carlos Bislip & friends”. Bunita anochi cu dushi ambiente, yena cu amantenan di e musica clasico jazz cu su subida y bahadanan den ritmo y melodia.

Y nos a drenta e luna di maart cu hopi anticipacion pa celebra nos dia nacional, dia 18 di maart, pero prome cu esey, nos dia internacional di hende muhe, cu ta dia 8 di maart.

 

Cu mi curason humilde yen di gradicimento Lady Ruth a acepta e invitacion di Fundacion Hende Muhe pa a recita un di su bunita poemanan den e studionan di TeleAruba riba dialuna mainta, drentando e siman di celebracion di e hende muhe.

Si, e dia aki, dia 8 di maart, un otro sorto di atencion na nos duna. Por bisa cu e hende muhe tin dos dia dedica na dje, dia 8 di maart y den luna di mei, dia 14, segun e calender, Dia di Mama. Nos ta gusta acentua riba nos “Elfje” y nos “Haiku” cu ta bisa: “Liefde – Met zorg – In haar hart – In stilte haar smart – Vrouw” y Un hende muhe – Amor ta brota di dj’e – Ta p’esey…cuid’e”.

 

Riba invitacion di nan presidente sra. Magaly Maduro, nos a inspira un poema titula: “Orguyoso of Dichoso” – Y un parti chikito di dj’e ta bisa asina ki:

Kico ta haci un muhe orguyoso di ta na Aruba?

Un muhe di Aruba mes y di otro partinan di mundo?

Pa ta orguyoso di ta biba na Aruba, traha of yuda

Kico ta bo motibo di mas profundo?

Ta sigui 4 couplet mas, pero nos lo cita e ultimo couplet cu ta bisa asina ki.”

Naaah, warda! Bo no tin mester di contestami

Pasobra, orguyo nunca tabata algo cu a molestiami

Sigui sinti bo orguyoso, pero mas tanto mas bendiciona

Dichoso pa ta aki, riba mi dushi isla stima y iniguala!”

 

Si tur cos a sigui bon, nos ta of a recita e poema aki tambe den Centro di Bario Playa Pabao diaranson dia 8 di maart den oranan di anochi. Den dia nos ta of tabata como parti di e publico na e programa tradicional y di custumber di Minister Michelle Hooyboer Winklaar na Renassaince conference center e mesun dia ey, den oranan di mainte te cu 3’or di atardi cu oradornan interesante den nan temanan personal y of profesional.

Trabao igual, pago igual, trato igual etec, ta topiconan cu kizas ta nobo ainda na varios pais, aunke nos si por vota y nos por vocifera nos opinionnan den tur cos cu respet pa nos mes y pa otro. Mi no por nenga, mi ta un di nan cu ta sigui pensa cu tin cos pa homber so haci y tin cos pa muhe so haci, mi no kier haci tur cos cu un homber ta haci.

 

  1. e. mi no kier cambia un tire di auto si e ta flat. Cu ta parti e trabao den cas ta algo tremendo, cuida e yiunan hunto, pero mester keda e diferencia entre homber y muher. Hende homber ta fisicamente mas fuerte cu hende muhe, nos tin mas emocion, mas amor y mas ternura como e curason di nos hogar, toch?

Nos mensahe di semper: “Stima bo mes pa bo por stima un otro y laga alegria ta pardi di bo bida tur dia”. Na tur hende muhe di Aruba: “Un dushi dia yen di inspiracion y alegria!”

Corda tene nos bon reputacion na halto…sea un bon ehempel, un bon role model tur dia!

Papia berdad, biba e berdad…un consenshi limpi ta ponebo luci cu bunitesa paden pafo!

Y pa Lady Ruth…no tin mester di añadi nada cu ta falso y artificial! Ta bo mes semper!

Orguyoso of Dichoso…e combinacion magico aki ta miho ora añadi un crenchi amor!

Leave a Reply

Top