Booshi Wever: Electorado Hulandes a “reken af” cu populismo extremo y exagera, mescos cu e partidonan tradicional, dunando e partidonan progresivo e respaldo necesario

Partido VVD di Premier Mark Rutte a resulta atrobe e partido mas grandi den eleccionnan na Hulanda y UPP kier a felicita e y su partido p’esaki.

Tambe UPP ta felecita e pueblo Hulandes cu a sa di “reken af” cu e populismo extremo y a manda un señal particularmente e partidonan tradicional.

 

Ta hopi remarcabel cu partido PvdA, partner den coalicion cu VVD, mester a carga cu e derota di Gabinete Rutte. Esaki por wordo mira como un castigo di e electorado Hulandes, particularmente di e partido aki, desaprobando e maneho, na unda e ambicionnan social-democrata mester a duna preferencia na un maneho liberal, derechista y capitalista.

Cu excepcion di su maneho pa cu su partnernan den Reino, Gabinete Rutte a haya hopi elogio pa e ehecucion di un maneho economico y financiero restrictivo/stringente (“eerst snoeien, en dan groeien”), unda cu e gruponan mas debil y vulnerabel di e comunidad Hulandes a bay atras.

E economia Hulandes a conoce p’e motibo aki of kizas apesar di esaki, un crecemente enorme, cu e consecuencia un caida den desempleo y aumento di poder di compra di juist e gruponan menos vulnerabel.

 

UPP por constata cu Hulanda a tuma distancia di partidonan cu ta yama nan “izquierdista” y cu e electorado a profila su mes menos izquierda y a move bay mas den centro.

Den temponan dificil e electorado Hulandes sigur ta desea of exigi un posicion cla y raspa di su partidonan y no uno cu ta keda swing of keda den neutral djis pa gana of garantisa voto.

E resultado di eleccion mester wordo mira como un señal cla y raspa na Hulanda cu e pueblo ta desea un cambio den e panorama politico na Hulanda.

 

UPP como un partido progresivo a constata cu particularmente e partidonan progresivo y chikito a bay dilanti.

UPP ta spera tambe cu e electorado Arubano por saca un conclusion tambe for di esaki y cu ta tempo pa un cambio aki na Aruba.

Aruba lo ta beneficia cu un cambio riba e podio politico aki na Aruba, na unda cu no por tin espacio mas pa un partido so ta na mando, sino cu lo tin un Gobierno di coalicion unda uno por controla e otro mas mihor.

 

Na Hulanda tambe loke a tuma lugar ta un rechaso di lo ta “populismo”. Particularmente loke ta esun extremo. Loke nos ta spera cu na Aruba tambe esaki por tuma lugar.

Y cu no sosode contrario cu loke a sosode na Hulanda.

Na Hulanda, mientras e Gobierno lo a goberna relativamente bon a perde, aki na Aruba ta honra juist un Gobierno cu a traha malo.

E Gobierno actual compara cu esun Hulanda, a scoge juist pa un maneho “groeien en niet snoeien” cu tur su concecuencia financiero y economico pa nos pais.

 

Leave a Reply

Top