Boso ta sinti feliz y contento cu tanto ladronicia?

Skirbi pa: Hiacintha Thijsen-Trimon

E culpablenan cu ta consenti maldad y ta aplaudi ladronicia, atraco y kiebronan den negoshi di comerciantenan y cu ta sostene pedofilnan, tin nomber y fam: AVP.

Pasobra te ainda AVP, na cabes sr. Mike Eman y Minister Dowers, hunto cu e 12 Parlamentarionan, no kier saca un dede pa combati abuso sexual di mucha.

Ladronicia y atraconan ta sosode den dia cla. Mester bini cu castigo minimo di 10 aña di prizon, pa burdugonan cu ta daña nomber di Aruba.

Ser honesto y bisa pueblo, pakico no kier cambia ley y bini cu castigo minimo pa combati criminalidad. Seguridad di pais Aruba a pasa pa historia, no tin clemencia ni pordon di burdugonan cu ta trapa riba seguridad di esnan cu ta paga nan belasting.

Coruptonan narco complacientenan, pedofilnan criminalnan, atracadornan, ladronnan y capitalistanan ta esnan cu ta dirigi pais Aruba y campistanan no tin nada di bisa.

 

Pueblo ta paga e 12 Parlamentario (“Payasonan”) di AVP cu sin ningun tiki di berguensa, simplemente bou ordo di nan Amo mester grita VOOR pa defende criminalnan y nan salario barbaro cu nan tin y asina a lubida riba seguridad di pais Aruba.

Cu tur respet pa Minister Arthur Dowers, acepta cu bo no ta sirbi p’e puesto di Husticia.

Bo a fracasa y bo a demostra esey. Tuma corahe y honor pa bo mes y hala un banda y laga otro tuma e timon di e barco cu yama Husticia prome cu e sink.

Bo a culpa mayornan pa mal educa nan yiunan, pa Aruba su inseguridad, pero para dilanti di un spiel, sr. Dowers, bo lo weita e culpable di mas grandi cu ta bo mes, cu tin Aruba ta biba den angustia susto miedo y na candal. Pueblo y bankeronan ta sclama y grita pa Minister Arthur Dowers bay cas y sigui drumi.

 

Sr. Javier Wolter di Caribbean Mercantile Bank, un homber hopi bon educa cu hopi conocemento, a trece su preocupacion padilanti y ta adverti esnan di Gobierno cu tin dos placa di sinti, cu holoshi ta tik tak cinco pa diesdos y ta manda un mensahe cla y raspa pa Gobierno, cu mester haci algo prome cu baca hoga.

Ta un crimen locual criminalnan ta haci, cu nan atraco y ladronicia den dia cla y tin Aruba su economia stagna pa motibo di inseguridad.

“Cheap labor” tin Aruba cu ilegalnan ta haya trabou mas lihe cu un propio yiu di tera, pa motibo di bendemento di permiso, pa despues ilegalnan por haya derecho di vota.

 

Djis coy un inventario den tur e hotelnan bo ta wak cuanto stranhero tin ta traha y cuanto yiu di tera tin ta traha y saca bo som. Ta avalancha di ilegal ta drenta Aruba sin ningun permiso y control y si nan no haya trabou, ta horta nan mester bay horta pa haya placa pa nan come y cu corupcion di permiso riba dj’e, stranheronan lo bira Aruba su perdicion.

Aruba ta yena cu ilegalnan y no tin cama pa tanto ilegalnan drumi, Aruba tin biyones di debe, pa nos tatara nieto of nieta bay PAGA. Aruba mester di un cambio y bo persona lo bay dicidi  destino di nos dushi pais Aruba.

Top