Botica di Servicio, Eagle, awor ta ricibi su coriente di energia solar

Botica di Servicio Eagle a caba di completa e instalacion di panelnan solar riba su dak. E t’e prome botica, for di e cadena su 5 sucursalnan, pa exitosamente converti den un negoshi di impacto neutral riba e medio ambiente.

E cadena di boticanan, conoci como Botica di Servicio, a tuma e decision pa ta ambientalmente responsable na tur 5 di su sucursalnan, via e instalacion di panelnan solar riba su propio edificionan y luznan di LED na tur sitio, esta Eagle, Palm Beach, Santa Cruz, Noord, y Seroe Preto San Nicolas.

Energia solar ta un escogencia natural pa Aruba unda cu e solo ta briya 365 dia pa aña.

 

Director Gerente, Lennert van der Poel a splica cu Botica di Servicio ta asumiendo un rol di liderasgo den e cambio di energia alternativo na Aruba, notando cu energia solar ta spaar placa a largo plaso, y ta un fuente stabil di energia, ademas di yuda contra “global warming”, cual ta un menasa cu nos tur mester enfrenta na un manera serio.

E instalacion di panel solar riba e dak di e botica tabata un esfuerso coordina entre Elmar NV, Engysol, All-in Lighting y Ro-Tech, cu cada compania contribuyendo n’e entrega puntual di e proyecto, contribuyendo nan mesun area di experticio.

 

E coriente genera dor di e panelnan lo drenta e red di Elmar NV, creditando e compania su cuenta di coriente.

“Nos a instala 356 panel solar,” van der Poel a informa,“cu lo genera 160,000kWh pa aña, cual ta mas cu Botica Eagle ta consumi, y nos lo sigui instala panelnan solar adicional na tur botica afilia.”

“Energia solar t’e mihor manera,” van der Poel a conclui, “y nos ta orguyoso di ta entre e promenan di utilisa fuentenan di energia alternativo riba e isla.”

 

Top