Bou di encargo di Minister de Meza: Carubbian Festival a inicia den un ambiente unico

Carubbian Festival a keda lansa na un forma tremendo diahuebs ultimo. Minister di Turismo Ing. Mike de Meza ta masha contento cu e evento aki cual tabata uno exitoso.
Joase-Ann van der Biest, PR di Carubbian Festival a laga sa cu tabata un gran honor p’e di por forma parti di e Carubbian Team cu tin e meta di “boost” nos herencia un tiki mas.

El a indica cu esaki ta un gran evento cu ta conociendo diferente programa cultural di nos isla y cu e idea di duna nan un tiki mas realce. Carubbian no ta solamente un festival.
Carubbian Foundation su meta principal ta organisa e festival pero pusha e herencia cultural di San Nicolas, Joase-Ann van der Biest a señala. Tin cosnan cu a cambia manera e concepto, e alocacion, y a crea algo mas grandi.
“Mi ta hopi gradici cu e comunidad completo y cu a tuma Carubbian cu brasa habri”, Joase-Ann van der Biest a manifesta.

Pa e prome edicion, a duna reconocimento na diferente persona den nos comunidad cu durante e transcurso di e añanan a sa di duna un aportacion inmensamente grandi na e cultura di Aruba.
E personanan cu a haya reconocimento ta: Diana Antoinette, Glenda Heyliger, Hubert “Juby” Naar, Vincent Mardenborough, Hubert “Mo” Mohammed, Charles Brown III y Miguel Phillis.

Diana Antoinette a nace na San Nicolas y e ta un bailarina bon reconoci y su forma di baila a trec’e unda e ta awe. Otro aña e lo celebra 50 aña den mundo di baile.
“Mi ta sinti mi masha orguyoso cu mi ta di San Nicolas. Mi mayornan semper a sostene mi. Un gradicimento principalmente na mi mayornan, pa nan a pone haci loke mi ta haci awe”, el a expresa. “Mi ta sinti mi hopi orguyoso di Carubbian”, el a agrega.

Vincent Mardenborough actualmente ta bartender na Amsterdam Manor Hotel. E ta un persona reconoci pa su baile limbo. E ta masha contento di por a haya e reconocimento aki.
Na 2000, el a haya un accidente y el a stop di haci limbo durante 5 luna. Su nieta a tuma su trabao over e tempo ey, el a bisa. Durante 20 aña, el a bishita hopi pais unda e tabata duna su show.
Na Aruba, e tabata duna su show na diferente hotel manera Holiday Inn, Marriott, La Cabana, Americana Hotel.
Awendia, e ta sigui duna su show tin biaha hasta 3 bes pa anochi y e ta gos’e hopi. E ta algo no solamente pa e turista, pero p’e localnan.

Mo Mohammed ta un obrero cultural. Asina e ta yama su mes. El a bisa cu e reconocimento aki no ta pe so, sino pa Aruba. El a indica cu e no a bay scol/academia pa siña, pero durante su trayectorio e tabata rondona pa hopi artista renombra for di cual el a siña. E ta gusta duna e hendenan jong un plataforma pa nan desaroya. Arte no ta un trabao pa su persona.

Juby Naar di su parti a indica cu e tin hopi profesion, pero hopi hende ta conoce como periodista. Antes e tabata nenga reconocimento pasobra e tabata pensa cu locual e ta haci e ta haci di curason. Un biaha, un mucha chikito a mustr’e, un dia cu el a haya un reconocimento, cu e reconocimento cu el a haya tabata “pasobra esunnan cu a duna bo e, ta mustra bo cu nan ta aprecia bo”, el a expresa. “For di e dia ey, nunca mas mi no a nenga nan”, Juby Naar a manifesta.

Un otro reconocimento a bay pa Glenda Heyliger. El a bisa cu e ta combina arte cu microbiologia, cual ta su profesion. E ta combina tur dos como inspiracion. El a haya e reconocimento aki pa su casi 25 aña di trayectorio. Heyliger ta un artista cu a sa di habri porta pa arte na San Nicolas y ainda e tin hopi pa duna ainda.

Leave a Reply

Top