Brandweer Aruba lo ricibi un Crash-Truck nobo un truck special pa Aeropuerto

Den siman un delegacion chikito di Brandweer Aruba a sali rumbo pa Minesota, Merca pa bay controla e detayenan p’e truck nobo cu pronto lo mester drenta den servicio na Aruba.Cada tanto tempo Brandweer, mescos cu e diferente otro instancia na Aruba cu ta uza vehiculonan special, mester evalua y calcula ora mester cambia un di esakinan pa motibo cu nan ta bira obsoleto.

 

Den transcurso di e añanan ekipo ta daña of no ta haya piesa mas pa nan. E ora e team di experto di Brandweer mester sinta na mesa delibera riba idea y necesidadnan cu un truck asina tin mester.

For di aki ta traha un programa van eisen cu ta bira e base di guia pa por haci bid pa evalua cua fabrica lo haya e trabao di fabrica e truck segun e specificacion den e programa van eisen.

Den e caso aki e compania Mericano Rosen Bauer a gana e bid y a cuminsa traha riba e truck cu e specificacionnan rekeri den e “ Programa van Eisen “.

 

E delegacion cu a caba di subi avion rumbo Merca ta bay controla e fase di e proceso di fabricacion di e truck cu t’e pre-build. Asina cu caba di inspecciona y aproba e documentonan di e vehiculo, e proceso lo drenta e proximo fase cu t’esun fabricacion di e vehiculo mes, e fabrica lo por finalisa e fabricacion di e truck segun e specificacionnan exigi den e programa van eisen y Brandweer Aruba lo haya su truck nobo p’asina por brinda e servicio necesario na comunidad.

 

E delegacion di Brandweer ta consisti di Officier Tromp, Bevelvoerder Maduro y Manschap Nobrega.

Top