Brandweer ta bautisá Crash Tender

 

BOTTON – Diabièrnè ultimo, Cuerpo di Bombero Hulanda Caribense  (BKCN) a tene un ceremonia special pa bautisá un ‘crash-tender’ nobo na aeropuerto Juancho Yrausquin Airport na Saba.

E vehículo nobo di brandweer ta special pa operacionnan n’e aeropuerto di Saba y a cuminsá usa esaki despues di un siman di entrenamento dor di técnikonan di e compania Rosenbauer.

Tur personal di bombero, maneho di aeropuerto y Gezaghèber Jonathan Johnson tabata presente n’e ceremonia.

 

Comandante General Cuerpo di Bombero, e Arubiano, Jair Tromp a biaha pa Saba p’e ceremonia aki.  Jair Tromp a splica cu e Ministerio di Seguridad y Husticia a duna òrdo pa bin cu ‘crash-tender’ cu ta cumpli cu e exigencianan specífico pa Saba cu ta un aeropuerto categoria 3.

“A tuma mas cu un aña y mi ta hopi contento cu porfin e vehículo aki tey y cu nos por usa esaki na momento cu ta necesario.

Mi ta orguyoso tambe cu durante e añanan tras di lomba e team aki na Saba a sigui entrenamento y curso pa ‘upgrade’ riba vários disciplina di combatimento di candela y maneho di desaster.

Nos mision pa fortificá brandweer den henter Hulanda Caribense ta continuá. Mi ta contento cu e resultadonan te cu awor. “

 

Gezaghèber Jonathan Johnson a hiba palabra na nòmber di Colegio Ehecutivo: “Cu yegada di e vehículo nobo di brandweer aki mi ta spera cu tur hende lo reconocé e inversion cu Gobièrno Hulandes ta haci riba nos isla.

Cu e inversionnan material aki y tambe e ‘upgrade’ di personal, nos ta corespondé na cierto expectativa y norma.

E añanan benidero nos tin cu sigui expandé loke nos tin awor pa por corespondé n’e exigencia- y normanan standard”, Gezaghèber Johnson a declará.

 

Comandante local, Julio Every, a gradicí su team pa nan esfuerzo hací y nan compromiso cu nan trabou.

“E crash tender aki ta un mehoracion grandi no solamente pa nos departamento, pero tambe p’e aeropuerto pasobra e vehículo ta carga e nòmber Juancho Yrausquin..

Como team Saba nos ta comprometé pa semper cuida nos vehículo y ekiponan y lo continuá pa upgrade y mantené nos profesionalismo den e organisacion.”

 

A duna e honor na bombero Reid Barnes y Michel Johnson pa bautisá e vehículo nobo aki.

 

 

 

Top