CAFT ta saca un raport alentador riba finanza publico di Aruba: “Pa Aruba ley ta prescribi un deficit na 2017 di 0,5% y na mitar aña caba nos a yega na 0,7%”

“Pa prome bes den historia di pais Aruba nos tin perspectiva di reduccion di nos schuldquota. Nos ta hopi contento cu esey”, Prome Minister Mike Eman a bisa despues di a haya e ultimo raport di CAFT unda esaki ta keda anuncia.

Hunto cu su colega Minister di Finanza, mr. Bermudez, Prome Minister Eman a anuncia loke cu CAFT a manda pa Gobierno despues di a analisa e situacion na Aruba.

 

Gobierno ultimo añanan a pone hopi enfasis riba crea stabilidad y crea tambe un finanza publico duradero. Un aña pasa a pasa un ley den cual a pone normanan importante cu Gobierno mester atene su e mes na nan pa por logra reduci e deficit y poco poco tambe reduci  e debe di pais Aruba.

Eman: “Awe nos tin un raport sumamente alentador di CAFT riba finanza publico di Aruba. E meta grandi di Gobierno tabata pa na 2015 realisa un deficit di 3,7%.

Despues di a analisa e cifranan di 2015 CAFT a yega n’e conclsusion cu Gobierno di Aruba a mas cu realisa e meta aki y cu e deficit tabata hasta bou di 3,7%.

Na 2016 nos mester a logra un deficit di 2% y na fin di 2016 CAFT a yega n’e conclusion cu Gobierno di Aruba a realisa e deficit di 2% aki y awe atrobe CAFT ta anuncia un otro logro grandi.”

 

Na 2009 ora Aruba tabata den un crisis y e Gobierno aki a tuma over, tabatin un caida grandi den economia di Aruba y tabatin un finanza publico hopi afecta.

E tempo ey e deficit tabata alrededor di 5%. Eman ta bisa cu sistematicamente –  apesar di a inverti y no austerisa – e mesun inversionnan aki tin como resultado cu nos economia ta bay creciendo poco poco y Gobierno ta mira impactonan positivo di e vision pa stimula e economia na momento cu e economia tin mester di e estimulo aki.

 

“A scoge p’e sistema di stimulacion di economia y nos ta mira awor cu e deficit ta bahando mescos e debe tambe hustamente, pasobra nos ta yega n’e punto di un Balanced Budget.

Na 2016 nos a yega na un deficit di 2% cu a wordo certifica tanto pa CAFT como Rekenkamer.

Pa 2017 ley ta prescribi un reduccion aun mas grandi di 0,5%. Segun e raportahe di CAFT riba e di prome mitar di e aña aki nan ta yega n’e siguiente conclusion.

 

‘De positieve resultaten van de overige entiteiten tesamen binnen de collectieve sector leidden ertoe dat het tekort van de hele collectieve sector op het eerste halfjaar uitkomt op 0,7%.”

Eman a bisa cu e meta ta pa alcansa 0,5% na final di e aña aki y e ta convenci cu esey ta bay sosode tambe.

“Midiendo n’e resultadonan di e prome mitar di aña CAFT ta yega n’e conclusion cu nos ta na 0,7%. Nos tin tur confiansa cu e diferente factornan cu lo hunga un rol den e di dos mitar di aña, ta percura pa nos yega nos meta di 0,5%.

 

Reapertura di e refineria a conoce un poco tardansa y esaki tabatin su impactonan. Pero asina nos yega na fin di 2017 y inicio di 2018 nos ta bay mira mas impacto di e rehabilitacion di e refineria.

Esey sigur ta bay refleha den e presupuesto di pais Aruba. Mescos tambe nos ta mira un crecemento grandi den turismo cu ta trece mas ingreso pa Aruba.”

Top