Camara di Comercio a tene un di dos reunion cu fraccion di MEP

Despues di e reunion fructifero riba 14 di februari ultimo entre fraccion di MEP y Camara di Comercio (KvK), a keda acorda cu lo tene un reunion mas pa por sigui discuti riba e puntonan di agenda.

Den e reunion anterior a elabora e.o. riba desaroyo y diversificacion economico, Caya Grandi y necesidadnan di e empresario.

MEP a duna di conoce cu nan ta balora e aporte cu KvK ta trece dilanti p’e empresarionan.

P’e motibo aki tambe a pidi pa un reunion mas caminda por intercambia idea riba e desaroyonan actual di Aruba.

 

Durante e di dos reunion MEP a mustra interes pa scucha di KvK riba e desaroyo encuanto empresario hoben.

KvK a indica cu e empresario hoben mester di guia y ayudo facilita dor di Gobierno. A trece ideanan con pa stimula e empresario cu kier cuminsa un negoshi y yuda cu e financiamento pa start up.

KvK a trece dilanti puntonan cu por contribui na duna bida bek na Caya Grandi.

Inversion a wordo haci, pero no ta mira cu esakinan a duna resultado n’e comercio den Caya Grandi.

 

A discuti y intercambia idea y informacion cu MEP y KvK tin encuanto CITGO. A papia encuanto e topiconan ROP y ROPv y KvK a trece su opinion encuanto con pa formalisa esaki y pakico e tin su prioridad.

KvK a sugeri varios idea cu por yuda facilita comercio di Aruba. Di financiamento te n’e mundo cibernetico cu ta afecta e benta di e comerciantenan.

 

MEP a tuma nota di e puntonan di KvK y a vocifera cu esakinan ta sigur puntonan importante cu nan lo tene cuenta cune pa nan plan strategico mirando cu eleccion ta na caminda.

E reunion a termina den bon forma y tur hende a keda satisfecho. Maske cu e comunicado ta bisa di un reunion cu fraccion di MEP, ta un par di miembro di MEP so a acudi.

Leave a Reply

Top