Camara di Comercio a tene un segundo reunion cu fraccion di AVP

Manera a wordo acorda na final di e prome reunion entre fraccion di AVP y Camara di Comercio (KvK), a tuma lugar e segundo reunion p’asina sigui elabora rib’e puntonan di agenda.

Algun topico cu a wordo dialoga extensivamente durante e prome reunion ta e. o. situacion di Caya Grandi, sosten na e empresario hoben y “micro financing” pa empresario.

Rib’e temanan aki a wordo acorda cu KvK lo bay trece ideanan dilanti riba cua fraccion di AVP lo por duna nan opinion y asina cana e caminda pa yega na solucionnan concreto.

Fraccion di AVP ta mira e importancia pa tuma den consideracion e opinion y sugerencianan di KvK riba comercio p’asina yuda den e desaroyo economico di Aruba.

 

E di dos reunion tambe a bay hopi bon y a papia encuanto seguridad tur caminda en particular pa e empresario y su negoshi, un update encuanto CITGO su desaroyo y situacion laboral, desaroyonan pa cu ROPV y infrastructura di Aruba y por ultimo a toca e tema di e plan cu tin pa cu dump y procesa sushi na Aruba. KvK a discuti cada un di e topiconan cu fraccion di AVP y a haci diferente remarke y preguntanan critico p’asina por haya un bista riba con fraccion di AVP ta opina riba esakinan.

Fraccion di AVP di su banda a trece dilanti kico e situacion ta actualmente y kico e plan di accion ta di banda di fraccion di AVP.

 

E reunion a culmina cu esnan presente indicando cu e intercambio di opinion y ideanan treci dilanti ta hopi interesante y lo bay tuma e pasonan necesario pa por formalisa nan pa e bienestar general di Aruba.

KvK ta recorda un y tur rib’e fecha cu e debatenan lo tuma lugar cu ta diahuebs, 8 juni 2017 y diahuebs, 17 di augustus 2017. E debatenan lo ser transmiti en bibo via TeleAruba. Pronto KvK lo comparti mas informacion encuanto e debatenan.

Leave a Reply

Top