Camara di Comercio tabatin un reunion importante cu Banco Central y Asociacion di Banco di Aruba

Dia 4 di mei ultimo Camara di Comercio y Industria di Aruba (KvK) a tene un reunion cu Banco Central di Aruba (CBA) y Asociacion di Banco di Aruba (ABA).
E motibo principal di e reunion aki ta pa trece claridad riba e papel y responsabilidad cu banconan tin encuanto ‘e-business’.
Otro punto p’e reunion ta pa sondea e forma con banconan por facilita tanto e comerciante como e cliente pa haci transaccion den e mundo digital.

KvK a extende un invitacion na CBA y na miembronan di ABA p’asina por sinta na mesa y hunto discuti e puntonan encuanto sistema di pago p’asina yega na solucionnan cu ta yuda e comercio di Aruba.
KvK su meta tras esaki ta pa di e forma aki representa e comerciante local pa nan por yega na tin e posibilidad di un mihor servicio na nan clientenan por medio di un mihor plataforma pa haci ‘e-business’.
Actualmente na Aruba nos ta hopi atras den esaki y e topico di ‘online shopping’ no ta nada nobo.
Den e ultimo aña a mira un crecemento hopi significante pa loke ta ‘online shopping’ no obstante e limitacion cu Aruba tin pa por haci ‘e-business’.
KvK kier logra cu hunto cu CBA y ABA por yega na solucionnan pa un structura di pago online cu ta acesibel, confiabel y bon proteha contra crimen cibernetico.
Hopi comerciante ta duna di conoce cu nan ta haya nan ta perde oportunidad di haci negoshi dor di nan limitacion den e clientenan cu ta opta pa haci ‘online shopping’.

KvK kier evalua hunto cu e instancianan financiero riba e topico di e ‘red tape’ cu e comerciante ta wordo confronta cune ora cu kier habri un cuenta comercial na un banco. Tambe cu e ta dura hopi largo ora di haci transaccionnan entre e banconan.
A discuti e papel cu tanto e banconan comercial como CBA tin p’asina regula e transaccionnan cu ta costa e comerciante tempo y placa.

Pa medio di e reunion aki, KvK kier a trece e topico aki riba mesa pa tur duna nan punto di bista riba esaki y asina yega na un solucion p’e obstaculonan aki.
E reunion a bay hopi bon y tabata uno hopi constructivo. Pronto lo sigui cu un otro reunion p’asina yega na plan di accion concreto. KvK kier a gradici CBA y ABA pa ta presente n’e reunion aki.

Top