Caminata unico den naturalesa di Unkobon

KRALENDIJK – En coneccion cu celebracion di su promé lustro, Unkobon, Union di Konsumidó Boneiru, ta organisá un caminata den naturalesa dia 5 di november próximo.

Salida lo ta 7or di mainta for di vèld di Snip (Tra’i Montaña). Lo tin un ruta di 4 y uno di 8 km. Ambos ruta lo ta riba caminda di tera den relativamente bon condicion.  E bunita caminata aki lo pasa banda di kunukunan pintoresco, por apreciá e bunita flora y fauna Bonereano y algun panorama mahestoso.

 

Boneiru completo por sostené e actividad di Unkobon aki, participando activamente n’e caminata aki. Gasto di participacion ta $ 15,00 y ta incluí un flanel original di Unkobon y un tas tambe original di Unkobon. Tambe lo tin fruta y awa p’e participantenan.

E recaudacion lo ta na beneficio di e consumidor Bonereano.

Unkobon kier crea fondo pa por bin cu programanan di informacion tocante prijsnan den supermercadonan, bentaha di energia solar, ayudo individual via di un bentana di informacion, coreccion riba aumento inhusto di impuesto di erfpacht y hopi mas.

 

Durante e existencia cortico di Unkobon, Unkobon a logra hopi p’e consumidornan di Boneiru. Logronan grandi tabata: WEB mester a debolbé placa di mas cobrá na tur casnan na Boneiru, Unkobon a prueba cu supermercadonan no a baha of baha suficiente e prijsnan na momento cu a exonerá ABB, 500 hende a ricibí nan placa bèk di erfpachtbelasting cu incorectamente a wordo aumentá, palabracion di prijsnan maximo p’e macuto basico (BonKompra),

Unkobon a fungi como coordinador p’e raport di Nibud,

 

Unkobon a percurá cu pago di impuesto por wordo hací sin gasto na momento cu ontvanger a sera su cahanan, Unkobon a protestá y a logra cu e cambio den cobransa di belasting riba number di auto a bay sin problema. Tambe Unkobon ta tin y ta sigui cu hopi interes e desaroyo di entrega di gas y di e comunicacion aereo.

Organisando encuesta Unkobon tabata duna empresanan “feed back” tocante nan servicio na publico. Esaki a pone cu den mayoria di caso e servicio a mehorá y/o a bin cambio den sentido positivo.

Riba su pagina di facebook Unkobon ta facilitá e consumidornan pa intercambiá informacion cu otro.

 

Unkobon ta conta riba sosten di hopi hende. Sea solidario y inscribí bo mes. Benta di carchi ta cuminsá diasabra dia 30 di september. Riba diasabra y diadomingo entre 10 y 12or di mainta e participante por cumpra su carchi na v.d. Tweel Supermarket y na Bondigro. Tambe por bel 782 1009 pa informacion y compra di karchi.

Pa mas informacion bishitá e web site: www.consumentenbonaire.com of nos pagina riba Facebook Unkobon-ConsumentenBonaire.

Top