Campeonato Nacional di Ahedres a start weekend tras di lomba

Den e weekend cu a pasa, Federacion di ahedres di Aruba a start cu su segundo edicion di su Campeonato Nacional di Aruba. Aña pasa e hoben Mark Bueno a gana e torneo aki y a bira nos prome National Master. E aña aki, e no por ta presente dor di su estudio na Hulanda.

Segun e formula, e miho 10 hungadornan di Aruba a wordo selecciona pa participa den e campeonato aki.

Hungadornan cu a acepta e invitacion y a participa na e segundo edicion aki ta:
Woman Fide Master (WFM) Maria Diaz;
Candidate Master (CM) Octavio Croes;
Candidate Master (CM) Jose Pesqueira;
Angel Centeno;
Candidate Master (CM) Jomar Benschop;
Enrique Jacopucci;
Brian Diaz;
Woman Candidate Master (WCM) Zaily Arbona;
Hubert (Randy) Tromp;
Daniel E. Diaz.

Tur 10 hungador lo topa otro den 2 weekend di tempo. E prome weekend cu ta tras di lomba e prome 5 rondnan a wordo hunga.
Diabierna awor pa 8:00pm e di 6 rond lo wordo hunga. Y diasabra 8 di april pa 2:00pm e di 7 rond y pa 8:00pm e di 8 rond. Diadomingo dia 9 di april e ultimo rond lo wordo hunga pa 11:00am.
Tur wega lo wordo hunga den e SIMAR building na Sabana Blanco.
E pairing nan ta fiha desde comienso, asina tur hungador sa, adelanta kende nan lo bay topa cu cual color y riba ki fecha. E torneo aki ta un torneo valido pa rating internacional. Y como arbitro nos a invita Ulises Hernandez di Venezuela.

Despues di e prome 5 rondnan, nos tin na cabes e hungador mas hoben den e seleccion aki, Brian Diaz. Brian tin actualmente 15 aña di edad. Brian a score den e prome 5 rondnan 4 ½ punto.
Na di 2 lugar, nos tin un empate entre Jomar Benschop, Angel Centeno y Octavio Croes. Nan tur 3 tin awor 3 ½ punto.

E weekend venidero lo bay bira un masha interesante mas. Mayoria di e top-hungadornan no a topa otro ainda. Nos por haya un ganador cu actualmente no ta den e prome 4 lugarnan?
Kende lo bay bira nos Campeon Nacional e aña aki? Diadomingo dia 9 di april esaki lo ta conoci.

Top