Candela na lantfill di Saba

THE BOTTOM – Diamars 14 di febrüari 2017 mainta a descubrí cu tabatin un candela n’e landfill di Saba situá na Fort Bay.

Durante di e oranan cu a sigui brandweer, cu ayudo di Departamento di Obranan Público y ekipo di companianan priva di construccion, a traha pa a dominá e candela.

Durante di esaki tabatin hopi formacion di huma cu a plama bay te n’e barionan bisiña di St. Johns y The Bottom.

 

A instruí e habitantenan di The Bottom y St. Johns pa keda paden y sera bentananan durante cu ta tin hopi huma pa prevení inhalacion di huma.

Polis a sera e caminda cu ta conducí p’e landfill y a consehá e público pa no bishita e área, p’asina nan tene un distancia safe for di e candela y tambe di e huma pisa y sushi cu por tin den e aire a consecuencia di e candela.

 

Tur personal di brandweer disponibel mester a bay yuda atendé e candela, p’esey mester a sera Aeropuerto Juancho Yrausquin.

Legalmente no por tin tráfico aéreo sin presencia di brandweer na Aeropuerto. Pa mas o ménos 2.30 or di atardi a dicidí di laga e candela caba di kima na un manera controlá, bou di supervision di vários autoridad pa monitòr e kimamento.

Na momento cu a traha e comunikado aki tabata verwacht cu Aeropuerto lo a habri bek den oranan di atardi y cu lo por a resumí tráfico aéreo. Ainda ta investigando causa di e candela.

Top