Candidato riba lista di partido POR, Rolando de la Cruz: Un plan maestro di integracion cultural pa imigrantenan mester por!

Un persona semper alegre, talentoso y trahado sr. Rolando de la Cruz, a nace na aña 1959 na Republica Dominicana y cu su 23 aña a imigra na Aruba. Un musico y cantante di curason Rolando su optimismo ta uno contagioso, pero na mes momento un persona cu un determinacion inmenso.

Rolando no ta un persona desconoci den comunidad, specialmente e comunidad latino, como un personalidad di radio. Como locutor e ta persona hopi keri, na unda el a presenta programanan di radio na varios radio stacion cu programanan dirigi n’e populacion latino bibando na Aruba.

Como comerciante Rolando a sa di demostra excelencia na su clientela, cuminsando na 1983 cu su negoshi di benta di auto y towing services, cu te dia di awe ta uno exitoso y ehemplar. Durante eleccionnan di 2013 Rolando a forma parti di e partido UPP, na unda e por a desaroya su inkietudnan politico.

 

No obstante di ta procedente di Republica Dominicana, Rolando a sa di integra su mes cu e cultura, idioma y custumbernan di Aruba. Siña Papiamento tabata e prome cos cu el a exigi di su mes na su yegada na Aruba, un pais cu a ricibi’e cu brasanan habri y a dun’e un porvenir digno. Su integracion ta uno di admira na unda el a sa di participa den varios festival di tumba, cantando den e compas unico di e genero aki y den nos idioma Papiamento.

“Mi candidatura den e prestigioso partido POR ta pa demostra e comunidad latino y stranhero bibando na Aruba e rikesa di integracion social y cultural di e bunita isla aki. P’esey mi kier propone un plan maestro di integracion pa imigrantenan na momento di yega Aruba”, sr. Rolando de la Cruz ta elabora.

 

Hunto cu e ekipo di partido POR, Rolando ta para tras di digitalisacion di servicionan gubernamental, muy en especial pa locual ta e proceso aplica pa permiso.

“E tramite pa aplicacion ta uno importante pa proteha fronteranan di Aruba. Lamentablemente e mes un proceso aki ta un instrumento pa tramitadornan cu mal intencion di traha placa cu e necesidad di personanan cu kier aplica pa un permiso. Pa evita tipo di abuso y inhusticianan asina, mi kier bin cu un plan di acreditacion pa tramitadornan p’asina registra nan oficialmente y sigura cu nan ta haci nan trabao debidamente” sr. de la Cruz ta comparti, agregando, “Tur stranhero tin derecho di por aplica sin ningun problema.”

 

Tambe e candidato di POR ta preocupa cu e problemanan social andando riba nos isla.

P’esey Rolando ta para firme tras di partido POR su plan di Reforma Social, na unda lo pone mas atencion riba nos muchanan cu ta bay scol sin cuminda y cu tin falta di supervision di mayor despues di oranan di scol.

Tambe e ta para pa un programa di rehabilitacion eficiente pa locual ta e problematica di ambulantenan adicto “Choller” cu ta un menasa pa nos turista y hendenan local nan siguridad.

Segun Rolando, e personan aki merece un di dos chens den bida y merece atencion debi.

P’esey Rolando de la Cruz ta convenci cu dia 22 di september partido POR ta e miho solucion pa hiba pais Aruba den e direccion corecto di progreso.

Top