Candidatonan di AVP cu caminata di 5 KM den districto di Noord

E preparacionnan ta cla y awor ta invita pueblo di Aruba pa compaña AVP den e grandioso caminata di 5 KM “Padilanti cu Team AVP”.

Ademas di ta campaña, ta organisa diferente evento p’e candidatonan intercambia cu e pueblo y esnan cu ta bay vota den e eleccion di dia 22 di september awor. Un di e eventonan grandi prome cu eleccion ta un caminata di 5 KM.

 

Manera ta conoci, bou gobernacionnan di partido AVP a construi Linear Park, un proyecto cu no solamente tabata pa embeyece producto Aruba pero pa encurasha e ciudadanonan pa cana pa nan salud. El a duna resultado ya cu por mira cu for di oranan di madruga te oranan laat di anochi personanan di tur edad ta canando riba Linear Park.

 

Mirando e ambiente cu Caminata tin bou di e poblacion, Team AVP a planea un caminata grandioso cu ta bay tuma luga fin di siman aki den e grandioso districto di Noord.

Ta trata di un caminata di 5 KM, cu ta sali for di MFA Noord, un di e proyectonan ehecuta dor di Gabinete Mike Eman II, pueblo di Aruba ta keda cordialmente invita pa cana hunto cu AVP den barionan di Noord, hunto cu e candidatonan cu ta aparece rib’e lista berde.

 

Ta pidi tur e participantenan pa bini cu nan t-shirt berde y keds pa cana den un forma mas trankil. E evento aki ta tuma luga diadomingo, 13 di augustus, di 5’or di atardi pa 8’or di anochi.

E ruta provisional ta cu e grupo ta sali for di MFA Noord bay direccion stacion di gasolin na Palm Beach, despues bay direccion di Montserat, Semeleerstraat y direccion zuid bek pa MFA Noord. Ta trata aki di un ruta di 5 KM. Si bo ta prefera cana den grupo di bo candidato, tuma contacto cu ne.

 

AVP  ta invita ciudadanonan pa bin compaña e team berde den un caminata hopi ameno, durante cual ta bay tin animacion musical.

Top