Cantante y fotografo Celebridad Hulandes a sera conoci cu Aruba su Chef Celebridad

 

E famoso cantante-actor Hulandes Marco Borsato a yega na Aruba recientemente, acompaña p’e igualmente famoso fotografo-periodista Raymond Rutting, pa captura Aruba su lugarnan y personalidadnan iconico, incluyendo imagennan di e isla su Carnaval, su bunita playa y su hendenan, for di piscadornan simple pa streanan cultural.

Borsato, kende a lanta na Italia, consistentemente ta un di e artistanan di canto mas exitoso na Hulanda, y asina mes su interes activo den gastronomia a haci cu el a crea un reputacion respeta entre chef y amantenan di cuminda.

 

Rutting, un foto-periodista mundialmente renombra, cu un interes den Naturalesa, Arte & Cultura, Viahe y e Medio Ambiente, ya caba a bishita Aruba aña pasa pa saca un serie di potret titulo Caranan di Aruba.

E coleccion eclectico di portret a wordo exhibi na Hulanda como parti di e celebracion historico di e isla su di 30 aniversario di e Status Aparte.

E idea pa combina e dos artistanan pa un otro exhibicion di portret a nace ora nan a dicidi pa colabora riba un biahe pa Aruba.

E plan tabata pa Rutting conduci un klas maestro di fotografia, cu Borsato como e studiante/apprentice, capturando momentonan special di e bida di nos isla.

 

Diasabra, e duo talentoso a bishita Gold Coast Villas, specificamente White Modern Cuisine Restaurant, y su doño-propietario Chef Urvin Croes; nan a cushina hunto, a presenta e cuminda na un manera sumamente bunita riba e tayonan, y despues Borsato y Rutting a saca potretnan di e piesanan maestral.

E trio tambe a saca potretnan di e clubhouse y e bunita saliña cu ta rondona esaki.

 

Chef Urvin, Aruba su propio chef celebridad, a introduci White Modern Cuisine pa prome biaha na 2012. E Chef creativo y inovativo, naci na Aruba, a haya su entrenamento na Hulanda y na Italia, y a disfruta di un carera solido desde cu el a caba su scol culinario.

El a gana un cantidad di premio gastronomico, incluyendo Aruba su Competencia di Iron Chef na 2013, y el a traha den establecimentonan di alta clase manera e Grand Hotel Karel V, na Utrecht, Hulanda, cual tin un strea di Michelin.

Na su restaurant contemporaneo na Gold Coast Residence, e ta promove e harmonia entre cuminda y biña, balansando calidad y sabor, den nan forma mas puro, sosteni pa su casa Mary Ann, kende ta maneha e sala di come.

 

Aki por mira algun potret di e bishita di Borsato – Rutting durante nan bishita exitoso na Gold Coast Residence y White Modern Cuisine.

Top