Capitan, boto y 9 pasahero ilegal deteni drentando Aruba

Diaranson marduga, algo pasa di 2:00am, Guardacosta di Caribe Hulandes, cu su operacion na Aruba, a detecta un boto acercando nos isla. Mesora a saca un unidad riba lama pa investiga un ke otro. Na yegada di Guardacosta a constata cu e pasaheronan a baha di e boto caba, pues na e momento ey a detene e capitan y a tuma e boto den beslag mesora.

 

“Manera ta custumber, Guardacosta di Caribe Hulandes a haci un apelacion na Cuerpo Policial Aruba pa sosten y cooperacion y den algun minuut a mobilisa varios patruya pa e area.

Asina a cera henter e area di Mangel Halto y Santo Largo pa evita cu e hendenan por a scapa”, asina Randolph “Randy” Paskel, Hefe di Punto di Sosten di Guardacosta Aruba, a duna di conoce.

 

Na tur autoridadnan a logra detene no menos di 9 persona riba tera, procedente di e boto aki.

Nan tur a drenta nos isla na un forma ilegal. Pues, cu e capitan acerca, ta un total di 10 persona ilegal cu entretanto ta den man di Guardacosta y Cuerpo Policial.

 

Randy Paskel a conta cu pa por a logra gara tur e personanan aki, a haci uzo di boto di Guardacosta, personal di Guardacosta na tera, patruyanan di Polis, patruyanan di K9 cu nan cachonan special pa busca hende y tambe a haya refuerso di helicopter di Marina Real cu a yega den algun minuut y asina a facilita bista for di den halto.

 

“E procedura a cuminsa for di mainta caba, despues di detencion di e ilegalnan. Locual ta pasa ta cu nos ta interoga tur hende y despues pasa e 9 ilegalnan pa Guardacosta, cu mester procesa un ke otro pa deporta nan bek pa nan pais”, asina Lito Lacle, Vocero di Cuerpo Policial Aruba a splica.

Mas leu e Sub Inspector di Polis a splica cu “Pa e capitan si tin un procedura penal contra dj’e awo. Nos ta acus’e di mensen smokkel. Den pasado nos a yega di uza e mesun ley aki y Hues a condena e capitan na algun aña di prizon. Nos ta haci esaki pa descurasha e capitannan pa sigui cu e practica aki di transportacion di hende ilegal pa nos isla.”

 

Di otro banda, Cuerpo Policial Aruba a garantisa cu a aumenta control na costanan di nos isla for di masha tempo caba. Hopi hende no tabata sa, pero riba e boto di Guardacosta tur dia tin 2 Polis abordo, cu ta traha 24 ora pa dia, pa hunto garantisa cu ta mantene nos costanan cera y sigur.

Leave a Reply

Top