Carta di Director di Finansa ta confirma: E deficit financiero den presupuesto 2018 ta 195 miyon florin!

Ta parce cu e lider di fraccion di AVP, Marlon Sneek te ainda no kier comprende e mensahe cla y raspa cu pueblo votador a manda p’e y su partido den e eleccion di 22 di september ultimo.

Tambe manera ta su custumber caba sr. Marlon Sneek no kier mira ni comprende den ki desaster financiero su partido AVP a hinca nos pais aden den e ultimo 8 añanan.

Siman pasa su persona a yega te hasta asina leu di pretende cu no ta existi ningun presupuesto 2018 y cu no tin ningun cifra di deficit di 195 miyon florin.

 

Deficit di 195 miyon florin

Pero den su ignorancia e no a lesa locual ta para den un carta di 3 di october 2017 di Director di Departamento di Finansa dirigi na Informador caminda a ser treci padilanti lo siguiente: “Conceptbegroting 2018: Om de LAft norm voor 2018 van +0.5% BBP voor de collectieve sector aan overschot te bereiken, toont het huidige concept, bij ongewijzigd beleid (dus exclusief het nemen van nieuwe beleidsmaatregelen c.q. beleidsarm), een verschil van ca. Af. 195 miljoen”.

Pues claramente ta papia aki di un deficit astronomico di 195 miyon florin pa aña 2018 y pa cual sr. Marlon Sneek manera un avestruz ta keda hinca su cabes den tera pa no mira nada di esaki.

Pero mas cu tur e Director di Finansa a bisa den su carta tambe cu e responsabilidad pa soluciona e deficit di 195 miyon florin aki ta cay p’e Gobierno nobo cu ainda ta den formacion, pues e Gobierno di MEP-POR-RED.

 

Debenan di proyectonan PPP

Sin duda cu e deficit financiero di 195 miyon florin aki pa un gran parti ta atribui n’e debenan di e proyectonan PPP (Hospital, Green Corridor, Watty Vos Boulevard y e 4 MFA-nan). Asina nos por mira riba e tabel adhunto cu na 2017 nos tin cu cuminsa paga 38 miyon florin pa aña, sigui na 2018 caminda lo mester paga 58 miyon florin y na 2019 e suma di 72 miyon florin.

Y e 72 miyon florin aki nos pueblo lo tin cu sigui bay paga durante 25 aña largo! Porfin, bo a comprende e joke aki cu bo partido a hinca nos aden, sr. Sneek?

 

Marlon ta 8 aña laat

Pues lo bon pa Marlon Sneek, na lugar di manipula bisando cu no ta existi un presupuesto 2018 y tambe su instigacion relaciona cu e asunto di cantidad di 7 of 9 Minister den e proximo Gobierno, su persona cuminsa papia con su partido AVP a pensa di paga tur e debenanan extra aki di e proyectonan PPP y pa cual e Gobierno nobo lo mester bay busca e formula magico pa paga tur e debenan aki cu e lo bay haya su mes cu ne.

 

Por ultimo, partido MEP a haya e observacion di Marlon Sneek di cu awor e lo bay vigila skerpi skerpi tur e pasonan di e Gobierno nobo, 8 aña laat, ya cu si e mes como Parlamentario a haci su trabao drechi y controla su Ministernan debidamente, talbez awe nos pais no ta hinca den e pos financiero cu Gabinete Eman lo laga atras aki par di dia.

Pues na lugar di tabata skerpi skerpi durante 8 aña largo, a resulta cu Marlon Sneek su actitud den Parlamento tabata stompi stompi!

 

 

Leave a Reply

Top