Caso interesante pa Huez trata, De Veer Chain Theaters vs Land Aruba y ABC vs De Veer Theaters

Awe mainta pa 10.30 e compania De Veer Chain Theaters tin un caso contra di Pais Aruba, relaciona cu un pidi tereno cu e compania aki a pidi for di algun aña caba, pa ehecuta un proyecto grandi di Cinema.

Informacion cu nos ta dispone di dje ta, cu De Veer Chain Theaters a cumpli cu tur condicion pa por haya opcion riba e tereno, pero cu Gobierno no kier duna ainda.

Pesey a dicidi di entama e caso hudicial aki, pa por haya e opcion, pasobra tempo ta bay pasando y De Veer Chain Theaters ainda mester laga pinta e mapanan y prepara p’e construccion di un teatro di cine masha modern.

Mei-mei di otro aña e contrato cu De Veer tin na Paseo Herencia ta vence y como tal kier construi un Cinema masha moderno mes, cu ta un inversion di varios miyon.

Pero awor, banda di e caso cu De Veer Chain Theaters a entama contra di Pais Aruba, Aruba Birdlife Conservation (ABC) a agrega nan mes n’e caso hudicial aki.

Pasobra na opinion di ABC, aki ta trata di tereno cu ta protegi pa su flora y fauna, cu tur aña ta haya bishita di hopi parha, y nan a haci Aruba un habitat di nan. Y esaki mester keda protegi p’e parhanan aki.

Pe desaroyo di espacio di tereno di Aruba, for di 2006 ta stipula pe Landsverordening
Ruimtelijke Ontwikkeling (LRO) cu ainda ta vigente, segun ABC, y for di 2009 e Ruimtelijk Ontwikkelingsplan (ROP) ta reconfirma e ley aki.

E zona aki ta wordo considera un teritorio berde y como tal no ta permisibel pa haci construccion na dicho zonanan.

A base di ley, ABC kier defende su punto di bista cu di acuerdo cu ROP no ta permiti ningun clase di construccion na dicho sitio.

Pesey awe den Corte ABC ta pidi Huez cu e caso di De Veer Chain Theaters no ta admisibel den su demanda contra di Pais Aruba, unda e ta pidi pa duna e opcion, despues di a cumpli cu tur condicion cu Gobierno a stipula pa por haya opcion riba dicho pida tereno pa ehecuta su plannan pa un Cinema nobo y supermoderno.

Top