Caso sumario interesante, unda Ralph Maduro ta demanda rectificacion di 24ora.com

E conocido empresario, Ralph Maduro a sinti cu awor ta pasa cu cantidad di insinuacionnan, unda e.o. ta ser bisa cu e ta front pa negoshinan di Otmar Oduber, y cu nan ta socio di otro.

Ralph Maduro a busca abogado mr. Rossi Marchena pa entama un caso sumario na nomber di su compania Alpha Printing contra di Headlines Group, portal di noticia 24Ora.com.

E caso aki mester a tuma lugar diabierne ultimo caba, pero Huez a pospone pa mayan, pasobra Headlines Group no tabata cla. Huez a bay di acuerdo cu nan peticion y a dicidi cu mayan merdia e caso aki lo sigui.

 

Mientrastanto Headlines Group tin como abogado, mr. Glendeline (Lalo) Croes, kende lo bin demostra cu debidamente Otmar Oduber y Ralph Maduro ta socio di otro den varios negoshi. Interesante pa wak con Corte lo interpreta e demanda aki.

 

OTRO CASO

Otro caso pa difamacion t’esun cu e doño di e medionan di comunicacion Solo di Pueblo, Top 95 FM, Rumba FM, Canal 22 y Boletinextra.com y algun otro compania mas di publicidad y di construccion, a dicidi di entama via di nan abogado mr. Anthony Ruiz unda ta demanda pa Minister dr. Alex Schwengle rectifica su ponencianan, de lo contrario lo hib’e Corte.

 

Esaki tin di haci cu e publicacion den cual e mandatario a rebiba e caso di Lotto pa Deporte, unda Edmond Croes y su ruman Endy Croes, kende tabata Presidente di e Fundacion y despues a bira Director di e Fundacion y awendia Candidato # 11 riba lista di MEP, tabata envolvi.

Minister dr. Alex Schwengle a laga sa den un comunicado cu e ta evaluando pa cuminsa e proceso civil pa recobra e sumanan mal uza den e fundacion.

 

E compania di accountant a saca afo cu ta 5 miyon florin Lotto a paga na companianan liga n’e rumannan Croes, sin cu a cumpli cu reglanan di “Good Governance” di e fundacion. Pero Edmond Croes ta haya cu despues di tanto aña di insulto y difamacion cu ta basta y e kier pa Minister dr. Schwengle rectifica of e ta bay Corte.

 

Minister Schwengle no tin intencion rectifica nada, y e ultimatum poni, esta 2 bez 24 ora a expira caba, y no ta conoci si Edmond Croes lo demanda e mandatario.

No ta conoci si Corte lo trata e caso aki prome cu eleccion ainda, si acaso Edmond Croes scoge p’e caminda di Corte. Ya cu Huez no ta mira urgencia di e caso aki.

 

 

 

 

Leave a Reply

Top