Casonan penalnan serio posponi Tratamento caso asesinato na Olde Molen lo sigui dia 19 di januari, 2018

Diabierna mainta Corte di Prome Instancia di Aruba tabatin algun caso penal riba rol. Pero tur a wordo trata Pro Forma y a pone fecha p’e tratamento nobo di e casonan, di cual un di e grandinan tabata e asesinato dilanti Olde Molen dia 21 di mei ultimo.

 

E acusado Erick A.M.J. Schneiders di 23 aña t’esun cu ta wordo acusa di a kita bida di un persona. Ralph de Palm, riba 21 di mei 2017, dor di tire un of mas biaha cu un revolver na su cabes y/of pecho.

Manera ta conoci, e caso aki a tuma lugar riba un diadomingo madruga pa 4:28 ora cu Polis a wordo avisa di un caso di tiramento banda of dilanti di e discoteca/club Olde Molen.

 

Polis cu a presenta n’e sitio, a haya un homber tira na suela, y banda serca di su auto y cu perforacion di bala na diferente parti di su curpa.

A resulta cu e homber, identifica despues como Ralph de Palm, a fayece mesora a consecuencia di e tironan ricibi.

Mucho informacion no a bini den publicidad di e caso aki, cual tabata e di dos caso di asesinato den e mesun area, y durante e tratamento Pro Forma diabierna mainta tampoco no a duna mucho detayes.

 

Fiscal Kardoll a pidi pa pospone tratamento di e caso pa motibo cu falta algun pv ainda, pero e principal ta cu un testigo mester wordo scucha dor di Huez Comisario.

Huez y abogado di e acusado, mr. Illes, a bay di acuerdo pa sigui tratamento di e caso dia 19 di januari, 2018 pa 8.30 di mainta.

 

Tambe e mainta aki, a keda presenta e caso Pro Forma contra e hoben acusado Edmar A.L. di 19 aña. E tin diferente acusacion contra dje, entre otro cu: El a trata di kita bida di un persona riba 22 di juni 2017, dor di tire cu un arma di candela na su pia.

Tambe e ta wordo acusa di a menasa un persona cu morto riba 11 di mei 2017, dor di bis’e: “Bo kier mi hinca bo awor? Bo kier mi tira bo den frenta? Bo kier mi tira un handgranaat riba bo cas?” y/of a push’e cu un cuchiu na su barica”.

 

E ta wordo acusa tambe di posecion di un arma di candela y balanan riba 28 di juni 2017. Finalmente, e ta wordo acusa di tabatin e intencion di tuma bida di un of mas persona riba 27 di juni 2017, dor di los tironan riba nan cas.

 

Leave a Reply

Top