Celebracion di fiesta di Santa Anna, patrona di Parokia di Noord

Diaranson 26 di juli 2017 ta fiesta di San Joaquin y Santa Anna, e pareha casa cu tradicionalmente ta

wordo honra como e mayornan di Mama Maria, cu ta haci nan e abuelonan di Hesus.

 

Ki bunita ta cu Hesus tin abuelonan. San Joaquin y Santa Anna ta recorda nos n’e Incarnacion: Dios di berdad a bira hende y a drenta un famia humano cu no solamente ta inclui su mama Maria y su tata Hose como su mayornan, y esey nan mayornan y esey nan mayornan, te bek na Adam y Eva n’e principio di creacion di acuerdo cu cronologia di San Lucas ( Lucas 3:23-38).

Manera nos tur, Hesus a nace den un red di relacionnan, e “cuna di bida y amor” esey t’e famia (Huan Pablo II, Christifideles Laici, no. 40)

 

E antifonia di misa di awendia ta bisa: “Laga nos alaba Joaquin y Ana pa nan yiu; den nan Señor a duna nan e bendicion di tur pueblo”. E nomber Ana ta nifica: “Gracia, amor, plegaria”. Scritura Sagrado no ta conta nos nada di e santo. Tur cos cu nos sabi ta legendario y nos ta haya den e evangelio di apogrifo di Santiago, cu ta relata cu riba e edad di binticuatro aña Ana a casa cu e propietario di ganado cu ta yama Joaquin, un galileo, di e ciudad di Nazaret. Su nomber ta nifica “e homber na ken Dios a lamanta” y segun San Epifanio: “Preparacion di Señor”. E ta descendiente di e famia real di David.

 

Segun tradicion Santa Ana a nace na Betlehem y a casa cu Joaquin di Nazaret, tur dos ta descendiente di David. Hunto cu su esposo Ana a cria Maria pa bira un paragon, un modelo,  di birtud y a encomende n’e templo como mucha.

Ta bisa cu Ana a muri na un edad avansa. E mesun tradicion ta conta cu Joaquin, un doño di ganado adinerado, kende su matrimonio cu Ana no a produci di biaha un yiu. Esaki a wordo considera como un falta di bendicion di cielo, cual a resulta cu un sacrifico di Joaquin a wordo nenga na templo.

Joaquin ta corda e yiu homber cu Abraham a haya riba edad halto. Joaquin a dicidi di bay den desierto y yuna durante 40 dia. Ey nan un angel a aparece y a conte di e nacimento di su yiu muhee y el a bay encontra  su esposa n’e “Porta di Oro “ na Herusalem.

 

Parokia di Noord ta celebra e fiesta di Santa Anna riba diaranzon 26 di juli 2017. E celebracion ta cuminsa cu un nobena cu ta cuminsa dialuna 17 di juli 2017. Un ora prome cu Santo Sacrifcio di Misa ta reza un Santo Rosario na honor di Santa Anna. Cada dia e nobena ta dedica na un bario den Parokia di Noord.

E intencion ta cu durante e dia ey tur otro bario ta dedica na oracionnan n’e barionan specifico. E barionan na cual e oracionnan ta wordo dedica por trece alimento riba su dia di intencion particular p’e personanan den necesidad di nos parokia.

 

E celebracion ta culmina riba 26 di juli fiesta di Santa Anna. Un procesion lo sali for di Centro Deportivo Frans Figaroa y lo termina na misa di Santa Anna.

Tur grupo di oracion, scouting, AMG, gruponan uniforma, muchanan cu a ricibi nan prome Santa Comunion, hobennan cu ta bay haya nan confirmacion, cooperadornan pastoral y koornan tur lo participa den e procesion aki.

Aki un Santo Sacrificio solem lo wordo celebra. Despues di e SS di misa lo tin brindis pa tur parokiano di Noord.

Un invitacion ta bay na tur parokia di Noord, devotonan di Santa Anna y e pueblo di Dios en general pa bin asisti n’e celebracionnan aki.

 

Leave a Reply

Top