Celebracion Dia Nacional na Archivo Nacional

 

Dia 18 di maart, Dia Nacional, lo tin un exposicion na Archivo Nacional titula “Aruba ta nos tur” acompaña pa un dia cultural organisa pa Fundacion Amigonan di Archivo.

E festividad aki cada aña ta atrae hopi hende. Lo tin tentnan cu ta bende cuminda, cos dushi, buki, obra di man, cos di bebe.

 

Tambe lo tin diferente presentacion di gruponan di baile y di musica. Pa esnan cu bishita e exposicion, lo tin oportunidad pa gana diferente premio. E celebracion na Archivo Nacional ta cuminsa pa 9’or di mainta.

Amigonan di Archivo ta un fundacion cu kier contribui na haci tur hende mas consciente di e importancia pa cuida pa un archivo, sea ta di Gobierno, un empresa of hasta personal.

Archivonan ta forma parti di herencia di un pais. Nos mester cuida nan pa otronan por haci uzo di nan sea pa uzo personal, estudio scientifico of pa yuda den cualkier proyecto.

 

Anualmente Archivo Nacional di Aruba ta organisa un exposicion cu ta duna nos hopi informacion skirbi y visual di un topico di Aruba. Den e dianan venidero ANA lo duna mas informacion tocante su exposicion 2017.

Amigonan di Archivo ta invita henter comunidad pa bishita e festividadnan na Archivo dia 18 di maart proximo for di 9’or di mainta te cu 6’or di atardi na Sabana Blanco.

Top