CENSO Aruba ta anuncia Cambio di proceso den casonan di perdida di paspoort, of paspoort horta anticipando e cambio aki den Ley di Paspoort

Den pasado den casonan di perdida di paspoort of casonan di paspoort horta, ciudadanonan mester a bay Polis p’asina haci un keho oficial prome cu por a procesa un peticion pa un paspoort nobo.

Den pasado Reino a introduci esaki p’asina por combati fraude di paspoort.

Pero sinembargo, e proceso aki a pone un peso mas grandi riba e instancianan concerni y tambe mas presion pa cu administracion, sin cu esaki a trece algun balor agrega.

 

Awor CENSO Aruba, den colaboracion cu Kabinet van de Gouverneur Aruba, Korps Politie Aruba y Openbaar Ministerie, lo trece un cambio pa cu e proceso di perdida di paspoort, of paspoort horta anticipando rib’e cambio di Ley di Paspoort.

Ta asina cu awor, no mester bay Polis mas pa haci un keho ora bo perde bo paspoort of ora ela wordo horta, pero mester acudi di biaha na CENSO Aruba dor di bishita nan website www.censo.aw pa traha un cita of pasa na un di nan oficinanan.

 

Aruba awor ta na beurt pa bay implementa e proceso aki despues cu na Hulanda Ministerio di BZK conhunto cu Ministerio di Seguridad y Husticia, I&M Nederlandse Gemeenten y Polis na Hulanda a haci un prueba cuminsando for di aña 2009, caminda a resulta cu e cambio aki lo a kita un preshon enorme for di Polis dor cu e mayoria di e caso nan di perdida di Paspoort no ta casonan di fraude.

 

Ya for di 2013, Boneiro a cuminsa cu e prueba aki y na 2014 Curacao a sigui. Awor a yega e momento pa Aruba implementa e mesun proceso aki cu e cambio den ley di paspoort lo bin cune.

Cu e cambio aki, CENSO awor lo tin e responsabilidad pa identifica casonan mas serio, cu lo por tin di haber cu fraude, y asina CENSO lo traha hunto cu Polis y Ministerio Publico si esey ta e caso.

 

Cu e cambio di ley di paspoort, e lo haci e proceso mas facil pa e ciudadano cu perde su paspoort por yega na uno mas lihe, como cu awor e no mester bay Polis mas pa entrega un keho, sino mester bay na CENSO mes.

E manera di haci esaki mas conveniente pa e publico, ta dor di bay riba e website www.censo.aw, y traha un cita pa CENSO por brinda nos comunidad miho servicio.

 

Claramente, CENSO kier pa nos ciudadanonan ta mas conciente tambe di e peliger cu fraude di identificacion por trece cune. P’esey CENSO kier a recorda tur hende pa preveni fraude di identificacion of mal uzo di datonan personal, dor di warda esaki semper den un luga sigur! E seguridad di documentonan di identificacion ta un  responsabilidad di cada ciudadano! CUID’E!

 

Pa mas informacion por subi nos website www.censo.aw of pasa cerca nos na Hoofdkantoor Schoolstraat 2 of Dependance L.G. Smith Blvd. 66 of jama nos na 5223676.

Top