Centro di Control di Mahuma ta di Reino Hulandes y no di Corsou A sorpronde mundo di aviacion di kier prohibi Aruba Airlines di pasa den su espacio aereo

Gobierno di Aruba ta silencioso

Tabata diarazon ultimo, cu Centro di Control di Mahuma a tuma un decision unilateral, notificando Aruba Airlines di no por usa e espacio aereo di Corsou, tanten cu Aruba Airlines no paga su debe.

Algun observador a considera esaki un forma di boycot di parti di Centro di Control di Mahuma, relaciona cu Aruba a ground e avionnan MD di InselAir Aruba, pero esey sigur lo no wordo admiti.

Esaki ta meramente e motibo pakico for di tempo cu MEP tabata den Gobierno, unda su Minister Edison Briesen a bin ta lucha pa “independisa” e servicio cu Centro di Mahuma a bin ta duna, pa cual e ta cobra cuantioso placa.

 

E mandatario Arubano, Otmar Oduber a hiba un lucha mas tenaz y maske el a logra firma un protocol cu e partnernan, e.o. Corsou y cu Hulanda, pero despues Gobierno di Corsou despues di 10-10-10 a laga sa di lo no respeta esaki, pasobra e acuerdo logra tabata cu Antiyas y ya Antiyas no ta existi mas.

 

Awor e situacion a presente, unda Centro di Control di Mahuma a dicidi di demostra e poder cu e tin, maske cu nan sa debidamente cu control di espacio aereo, ta competencia di Gobierno di Reino.

Ta di lamenta e silencio di Gobierno, esta di Minister Mike de Meza, kende no a protesta p’e hecho aki.

 

OTMAR ODUBER

Nos a tuma contacto cu ex Minister di Turismo y Transporte, Otmar Oduber pa sa unda el a laga e deliberacionnan y unda Aruba ta awe.

El a cuminsa na declara cu loke cu tin awor, ta un bulamente pipa un biaha mas. Esaki tabata meramente e motibo pakico Aruba a bin ta hiba e discusionnan aki.

 

Turismo y aviacion ta demasiado importante pa Aruba y asina mes, Aruba no tin den su man, pero completamente e ta den poder di Corsou su compania situa na Mahuma, kendenan a dicidi di kier prohibi un avion cu no ta ni bula pa Corsou, pero ta sirbi Aruba.

Esaki ta netamente e preocupacion cu Aruba tabatin, segun Otmar Oduber, pero no solamente preocupacion, pero lamentablemente un derecho cu Aruba tin, mientras cu Hulanda a bula pipa pe.

For di e tempo ey, Gobierno di Aruba, a papia cu Secretario di Estado Hulandes, cu Ministernan Hulandes, Piet Hein Donnor, Ronald Plasterk pa purba yega na un solucion, pa duna Aruba su parti den maneho di espacio aereo.

Ta for di tempo di reparticion di bienes, e Ministernan no a duna esaki e atencion necesario p’e area cu ta wordo maneha dor di Mahuma.

 

E Centro di Mahuma ta maneha esaki den nomber di Reino Hulandes, pero e no ta di Corsou. Pero for di tempo di Colonia, e nomber di Corsou a keda y nunca mas a wordo regla, segun Otmar Oduber.

Y awor por mira e caso di Aruba Airlines, cu un decision tuma, cu facilmente por a perhudica un compania di aviacion di Aruba, cu no ta ni bula pa Corsou.

Otmar Oduber no por bisa cuanto e debe por ta, pero e ta sigur cu tin otro compania di Corsou cu tin mucho mas debe y contra nan Mahuma no ta tuma medida.

 

Aruba a bin ta lucha pa haya su participacion den e compania na Mahuma, pa cual Corsou no kier tende nada di esaki, siendo Aruba kier tin participacion pa defende su interesnan.

Tabata prome cu Corsou a bira un pais, Otmar Oduber a logra convence e coleganan di Hulanda, Camile Eurolings y di Corsou, Dick Coopers, unda a firma un acuerdo, unda a reconoce derechonan di Aruba den dicho espacio aereo.

Pero ora cu Corsou a bira un pais autonomo, no kier reconoce dicho acuerdo cu a forma firma p’e 3 partnernan di Reino Hulandes.

A bisa, cu e tempo aya Dick Coopers a firma pa Antiyas y Antiyas no ta existi mas y como ta no ta respeta e derecho cu Aruba a adquiri.

 

Despues Corsou si a lanta un compania N.V. totalmente di Corsou so, cu participacion di Hulanda y no a permiti Aruba haya sikiera un stoel den dicho N.V. A papia esaki cu Minister Suzy Romer, pero nada a bin afo mas.

E peliger cu Otmar Oduber ta mira ta cu unilateralmente Mahuma por tuma decision riba un compania di aviacion cu ta bula pa Aruba, pasobra e tin un debe habri.

 

Otmar Oduber ta lamenta cu Minister Mike de Meza, unda e ta demostra su silencio, manera no ta import’e, kico ta pasa cu Aruba. Esaki a ser mira dia cu e Secretario di Estado Hulandes, Sharon Dijksma, kende a tuma decision, mete directo den asunto di Aruba, sin cu un Minister di Aruba a protesta.

Asina a cuminsa torno na Aruba su Status Aparte, unda Aruba su aviacion ta categoria 1, segun Otmar Oduber.

 

Top