Centro di Pesca Spaans Lagoen ta busca Rey di Djampou

Comision organisador Torneo Spaans Lagoen, cu patrocinio di Fundacion Centro di Pesca Hadicurari den cooperacion cu Santa Rosa, ta invita tur piscado p’e reunion di capitan diabierna awor na Spaans Lagoen pa 7’or di anochi.

Aki lo repasa tur regla y haci palabracionnan final p’e torneo na cual lo determina, ken ta e Rey di Djampou di Aruba.

 

Torneo pa sa ken ta Rey di Djampou: Diasabra 18 di maart 2017 otro siman, dia nacional di Himno y Bandera, Centro di Pesca Spaans Lagoen lo tin un Torneo di Pesca cu e meta di busca pa sa ken t’e Rey di Djampou di Aruba.

Un torneo cu mas di 2500 florin na premio; 500 florin p’e boto na prome lugar, cu mas kilo di djampou; 300 florin pa di dos lugar y 150 pa tercer lugar.

 

Ademas di esaki, lo tin varios premio pa mayor ehemplar den e torneo, incluso mayor Conovis, Mulato, Picuda, Pisca Cora y Brasi.

Cada un di esakinan 100 florin efectivo como premio. E torneo ta di 4’or di marduga pa 4’or di atardi y por cuminsa pisa pisca di 2’or di atardi.

 

Reunion di capitan ta 10 di maart awor

Diabierna awor 10 di maart 2017 lo tin e tradicional di reunion di capitan na Centro di Pesca Spaans Lagoen, unda lo duna tur regla y palabra e detayenan final.

Inscripcion p’e torneo ta 35 florin pa participante y ta permiti un maximo di 4 piscado pa cada boto.

E prome participantenan inscribi lo ricibi nan T-shirt atractivo y tur participante lo ricibi un cuminda. Tambe lo tin oportunidad di participa den pot voluntario.

 

Dia di famia y bon ambiente

Publico en general ta keda cordialmente invita di awor caba pa un tremendo dia di famia festivo na Centro di Pesca Spaans Lagoen cu domino, un tremendo cushina, bar bon surti y musica crioyo bailabel pa un ambientoso celebracion.

Top