Cera conoci cu Phryme Magazine: “Aruba su prome revista exclusivamente tocante studiantenan den exterior”

Zomer 2017 lo ta uno sumamente interesante mirando cu un grupo di hoben cu ta biba y studia na Hulanda ta den pleno preparacion pa lansa Aruba su prome revista exclusivamente tocante studiantenan den exterior, digital y bou di nan propio direccion.

 

Cera conoci oficialmente cu Phryme – e revista digital di mas nobo cu ta cla pa cambia e custumber di revistanan ‘tradicional’. Phryme Magazine ta un proyecto ‘non-profit’ cu a inicia dor di tres hoben cu ta biba y studia na Hulanda; Zoe Arendsz, Lorenzo Dirksz y Jose Kock. Tres hoben cu tabata conoci di ta sumamente activo den organisacionan manera Parlamento Hubenil di Aruba y Circle K di Colegio E.P.I. prome cu nan a dicidi di continua nan estudio den exterior.

 

E revista ‘Phryme’ tin como meta principal pa brinda studiantenan di Aruba cu ta biba den exterior cu un plataforma unico pa comparti nan bida di studiante; no solamente cu e comunidad Arubano, pero tambe cu henter mundo. E hecho lamentabel ta cu cada aña, Aruba ta bisa ‘ayo’ na un grupo di mas di 200 studiante, y durante henter e trayectoria di e bida di e studiantenan aki, e comunidad di Aruba casi no ta scucha nada di nan.

P’e motibo aki, e fundadornan di Phryme a yega na e acuerdo pa brinda nos studiantenan den exterior, tanto esnan na Hulanda y tur esnan na otro parti di mundo cu un plataforma pa comparti nan storia.

 

Apesar di ta un revista cu lo inclui solamente hobenan di Aruba cu ta studiando den exterior, Phryme lo ta complementa na Ingles. E motibo di esaki ta pa haci cu Phryme ta un revista comprendibel pa mayoria persona rond di mundo. Na mes momento, esaki ta crea un oportunidad tambe no solamente pa promove Aruba su studiantenan den exterior, pero tambe pa promove Aruba como un isla turistico.

 

Despues di a inicia e proyecto aki y a traha duro pa mas di un aña, e hobenan encarga cu Phryme ta sumamente contento y ansioso di lo por comparti e bunita revista aki pronto cu henter pueblo di Aruba.

 

Finalmente, e team di Phryme ta gradici tur persona cu ya caba a sa di acepta Phryme como un revista nobo, y na mes momento ta invita henter e comunidad Arubano pa haci uzo di e oportunidad di registra awe mes GRATIS ariba: www.phrymemagazine.com p‘asina keda bon atento di tur movecion di e revista, pero principalmente e lanzamento oficial di e prome edicion di Phryme Magazine.

Pa cualkier pregunta, opinion of sugerencia, por contacta e team libremente a traves di info@phrymemagazine.com, y sigui nan riba socialmedia: @phrymemagazine.

Top