Ceremonia emotivo pa conmemora e 2.147 firmante di nos Status Aparte

 

Un ceremonia solemne hopi memorabel a keda celebra diahuebs atardi na Monumento 18 di Maart. Prome Minister Mike Eman a lidera e encuentro di representantenan di Gobierno, Parlamento, Parlamento di Corsou, pero tambe invitadonan y publico pa rindi honor na e 2.147 Arubiano cu casi 70 aña pasa a tuma prome stap pa nos autonomia.

Entre esnan presente tambe tabatin hopi famia di e firmantenan di nos Status Aparte cu a keda conmovi pa e homenahe cu a duna na nan antepasadonan. A menciona nomber, mustra potret y cende un bela pa cada un di nan, un iniciativa di Prome Minister Mike Eman.

 

Parti oficial a inicia pa 6’or di atardi y a transmiti esaki na television, como tambe atrabes di medionan social. Cu entrada di Su Excelencia Gobernador Alfonso Boekhoudt, Eltienne Yarzagaray a duna un bunita interpretacion di Himno di Aruba, Aruba Dushi Tera, sigui pa ofrendanan floral dedica na tur 2147 firmante cu nan nomber ta graba riba e monumento. Despues a sigui cu discurso di Presidente di Fundacion Monumento 18 di Maart, sra. Mary Wever-Lacle, como tambe di Prome Minister Eman.

 

E mandatario a resalta e presencia di dos di e firmantenan na bida, presente pa recorda e momento importante aki den historia di Aruba, esta sr. Frans Croes y sr. Jose Fingal pa kende el a pidi un aplauso y nan a ricibi un ovacion di henter e publico riba e plaza.

Despues di presentacionnan cultural cu a contrasta e talento di nos muchanan, cu e curashi di nos antepasadonan, a bay over na cendemento di e belanan. E momento aki tabata uno profundo y special pa presencia tumando nota di con tur hende, for di mandatarionan te na famianan di e firmantenan, a tuma tempo pa recorda riba e ciudadanonan aki, e balor di nan acto y loke e ta nifica pa nos awe.

 

Mientras cu chikito y grandi tabata cende bela na memoria di nos baluartenan, e nomber y potretnan tabata pasa riba un pantaya gigante. Un bes cu e parti oficial di e ceremonia a conclui, hopi a keda riba e plasa pa combersa y reflexiona. Comision Celebracion Dianan Nacional a coordina e prepartivonan di e ceremonia, haciendo e ideanan di Prome Minister Mike Eman un realidad, pa cual ta duna nan un palabra di pabien y danki pa e bon trabou.

Top