Chauffeur a perde control dal un pal’i lus kibra pa despues bay dal contra un mata di kwihi y bolter

Diadomingo algo pasa di 6’or di mainta, polis, materialwagen di brandweer y ambulans a wordo manda cu urgencia rib’e caminda prinicipal di Paradera, na altura di Burger King, pa un auto cu a bolter y cu lo a kibra un palo di lus, cu consecuencia cu e bario completo di Paradera a keda sin coriente.
Na yegada nan ta bin topa cu un transformator di coriente benta abou, un palo di lus kibra den dos y un Suzuki Swift cu a bolter den banda contra un mata di kwihi.
E chauffeur tabata pega den e auto y riba e auto tabata tin varios waya di coriente.

Inmediatamente a pidi presencia di ELMAR cu hopi urgencia pa nan kita e wayanan for di rib’e auto, pa asina brandweer por a cuminsa cu e trabounan di corta e auto y saca e chauffeur cu tabata herida.
Despues cu e chauffeur a keda libera, personal di ambulans a prepar’e n’e sitio y a transport’e cu urgencia pa hospital.
Aparentemente e auto tabata biniendo cu velocidad halto for di p’abou y e chauffeur lo a perde control rib’e stuur, baha caminda y dal contra un palo di lus kibr’e den dos, pa despues dal contra un mata di kwihi y bolter.

Paradera y becindario a keda sin coriente pa mas c’un ora y te den oranan di merdia, ELMAR y SETAR tabata n’e sitio trahando rib’e wayanan di coriente y di SETAR.

Top