Chemisch Analist Robin-Ann Didder: Mi t’ey pa sirbi mi pueblo esaki ta mi promesa dump lo no bira otro sero na Aruba

E habitantenan di Simeon Antonio no merece miho?

E habitantenan di e bario aki ta grita pa hopi aña caba, pero ta haya palabra so di promesa cu e situacion di dump ta drecha, pero realmente nada no a sosode.

Plataforma politico E Forsa Nobo ta kere den tuma accion y no para wak y nada no ta pasa, unda cu e bario di Simeon Antonio ta keda den un situacion asina inhumano, segun Robin-Ann Didder.

 

Loke si tin na horizonte ta masha simpel, huma dilanti nan y cu gasnan toxico cu ta sali. Plataforma di P.O.R. a sinta y sondea ki posibilidad tin pa drecha e situacion aki. Rapportnan tey y hasta articulanan manera: “Milieuwet Aruba over enkele maanden naar parlement”; Schuilen achter een milieuwet dat maar niet komt”; “Omwonende Parkietenbos leven naast een tijdbom”. No mester bay inventa e wiel pasobra den partido P.O.R tin experto cu por papia di e situacion aki y drecha esaki.

Robin-Ann Didder hunto cu e team di Plataforma politico P.O.R ta analisando e cambionan cu mester tuma luga y sigur den e prome 100 dianan den Gobierno ta bay traha rib’e situacion y sigur den prome aña ta dicidi kico ta bay haci cu e ley di medio ambiente cu aparentemente Aruba no tin.

 

Ora tin candela riba dump, polisnan tin nan man yen debi nan no sa kico pa haci. Den ultimo dianan a bishita hopi habitante y simplemente nan kier un oido.

Robin-Ann Didder hunto cu e Plataforma politico E Forsa Nobo tey pa yuda pasobra mester drecha e situacion aki. E situacion di dump no a keda sin haci su daño pa loke ta salud.

Tin mas cu 40 hende hende cu “COPD” AZV den e caso aki no ta traha preventivo pero curativo p’esey e grito pa yuda e hendenan mester haya oido.

“Mi mes ta un Chemisch Analist y awor ami tin e oportunidad pa busca informacion y wak kico por haci na bienestar di e habitantenan di Simeon Antonio”, e ta splica.

 

“Aki na Aruba no tin ley pa polucion di tanto pa aire, lama y tera. Un otro punto ta  si nos mester cana  banda di mangrovenan ta un tristesa pa mira cu piscanan ta muri tin yen di sushi di plastic. Den un raport cu mi a lesa mandatarionan ta bisa cu no por haya un definicion pa cierto producto plastico.

P’esey mi ta kere cu mester busca experto pa haci e trabao aki y si no tin na Aruba busca di exterior debi cu Aruba como un isla bunita y chikito no por sofoca den su mesun sushi.

Hasta tin pais den exterior ta cumpra sushi y kisas mester pensa riba esaki pa yega na un solucion”, e ta continua bisando.

 

Aruba tin sero caba manera Hooiberg y Jamanota, pero si laga e situacion asina aki un par di aña cu ora mi habri un buki mi lo mira cu Aruba tin otro sero cu yama sero Dump.

Tambe loke por a tuma  nota ta cu Gobierno di Aruba no a haci nada pa evita pa e dump aki crece den e bon aspecto.

“Ami mes no ta biba den Simeon Antonio, pero cu mi tey pa yuda. Mi ta pidi habitantenan di Simeon Antonio y vecindario pa haci un grito y mi lo bin yuda. Yama via 563-5540, pasobra mi  t’ey pa sirbi e pueblo, esey ta e promesa”, Robin-Ann Didder a conclui.

Top