CIBC FirstCaribbean su di 6 edicion di “walk for the cure” a recauda mas cu 1 cuart miyon dollar te cu awo

Eventonan pa recauda fondo den e region pa conscientisa nos comunidad tocante cancer a dal sali den di e islanan di Caribe unda cu CIBC ta opera. Ya caba a wordo recauda mas cu 267.119 dollar danki na mas di 160 compania cu a uni na e causa aki.

 

Na Aruba recientemente CIBC a organisa un Fitness Event, unda cu e comunidad a responde positivamente. Tabata un atardi ameno, unda cu tur persona presente por a haci ehercicio danki na e 7 instructor. Di e forma aki CIBC tambe a cuminsa duna su aporte na Aruba.

 

E di 6 edicion di CIBC FirstCaribbean su “Walk for the Cure” ta spera di atrae un biaha mas, mas di 20 mil caminado y coredo na e di 17 teritorio unda cu e banco ta opera.

E caminatanan lo tuma lugar durante e fin di simannan di luna di october 2017.

Na Aruba e caminata aki lo bay tuma lugar riba diadomingo 8 di october 2017 pa 6or di mainta.

 

“Nos ta hopi emociona pa e caminatanan di e aña aki. Tin un aumento di energia door di nos organisacionnan ya cu tin centenares di empleado di CIBC cu ya caba ta ocupa cu un cantidad di eventonan pa recauda fondo, y tambe planeando e diferente caminatanan”, tabata palabra di sr. Trevor Torzas, Ehecutivo Co-Chair di e caminata y Managing Director, Customer Relationship y Management.

 

“Aña pasa nos a recauda 500 mil dollar, cual a wordo duna na e organisacionnan di cuido di cancer unda nos ta opera. Di e forma aki nos ta apoya e trabou humanitario cu cada un di e organisacionnan aki ta empeña pa trece e cambio na tur persona cu mester di dje.

E aña aki nos ta bay haci tur cos posible pa sigura cu nos por surpasa e cifranan di aña pasa”, tabata palabra di sr. Mark St.Hill cual tambe ta Ehecutivo Co-Chair y Managing Director, Retail y Business Banking

 

Como un famia corporativo nos conoce e dolo y perdidad cu cancer ta trece cu ne.

Sr. St. Hill a bisa cu “CIBC kier conscientisa y yuda na detecta e cancer na tempo, y haci e bida un poco mas comfortabel pa esanan cu cancer, nan famia y e dunadonan di cuido”.

 

E fondonan recauda ta wordo uza pa duna asistencia, cuido y acesoramiento na pashentnan y nan famia. Ademas nan ta yuda pa aumenta conscientisacion dor di trece campañanan educativo den di e region. E fondonan ta yuda e diferente organisacionnan pa asisti cu e compra y mantenimento di ekiponan cu ta wordo uza pa diagnostica y trata e pashentnan.

 

Durante e ultimo 5 añanan e banco a recauda mas cu 1.3 miyon dollar for di e eventonan, esaki a wordo logra danki na e apoyo generoso di corporacionnan y diferente actividadnan organisa dor di nos empleadonan pa recauda fondo.

 

CIBC ta haci un yamado na comunidad di Aruba pa ta parti di e caminata “Walk for the cure”, unda cu tur fondo lo wordo duna na Fundacion Contra Cancer di Prostaat.

 

E carchinan pa participa na e caminata na Aruba ya caba ta obtenibel na CIBC FCIB situa na Tanki Flipo, por yama 5225600, tambe lo tin carchi obtenibel cerca Fundacion Contra Cancer di Prostaat. E caminata lo sali for di e parkeerplaats di e banco y lo termina eynan bek y lo tin un distancia di 5 km. E horario lo ta di 6 am pa cu 8:00am.

 

CIBC kier gradici e siguiente comerciantenan cu a yuda na e Fitness Event realisa recientemente cual tabata exitoso.

Danki na Aledda N.V., Terraza Holding, The Seaport Cinemas, Click Print, Safecom, High Performance, Dj Vibes, Red Cross Aruba, Save A Lot, Total Cleaning Services, Fruteria Virgilio, IBISA, Caribbean Trucking, BrandTastic, GenAir, DHL, Gerira Marketing, Andina Ice, Stichting Contra Cancer di Prostaat, CRD Group, Patrick Melchiors, e instructornan – Haysem Winterdaal, Yadira Leter, Gladys Duarte, Alexei Spinoza, Tatiana Gil y Juan David Maestre, empleadonan di CIBC y e comunidad di Aruba cu a duna nan aporte y cu tabata presente p’asina contribui na comunidad y pasa un rato deportivo.

 

Mas informacion lo wordo publica den e siguiente dianan. Tambe por sigui e banco riba Facebook: CIBCFCIB. Riba e potretnan por aprecia e anochi Deportivo di e Fitness Event.

Top