Cinco hoben di BYOF ta bay presenta na Aruba

KRALENDIJK – Riba invitacion di Cas di Cultura Aruba, cu ta organisado di Gang di Arte, cinco hoben di Bonaire Youth Outreach Foundation (BYOF) cu ta participa den e programa di arte yama BYOF Arts, lo bay presenta na Aruba.

Gang di Arte t’e competencia di talento di Aruba. E aña aki lo ta e di 11 edicion di e competencia aki.

 

Durante di e Theater Booth Camp cu a tuma luga den e prome siman di vacacion BYOF Arts a scoge cinco hoben for di trinta participante pa bay Aruba. E hobennan a keda scogi a base di nan prestacion durante di e ultimo seis lunanan. A evalua e hobennan riba crecemento di nan talento, pero tambe nan comportacion y prestacion na scol. E tabata un escogo hopi difícil ya cu tabata tin mas cu cinco cu a cumpli cu e exigencianan pa por bini na remarke, pero ta cinco hoben so por a keda invita pa bay e intercambio aki.

 

E cinco hobennan a prepara diariamente, bou di guia di Segni Bernardina y Damari Alonzo, p’asina nan ta bon prepara pa bay presenta un tremendo presentacion den e theater nacional di Aruba. Dia 9 di augustus elenco di BYOF Arts lo sali pa Aruba p’asina asisti n’e ensayo general pa despues, dia 10 subi escenario pa presents nan presentacion titula “Boneiru ta den kaya”.

E presentacion aki ta basa rib’e tema cu a keda scoge e aña aki pa Gang di arte. E tema ta “Kaya”.

 

E hobennan cu lo bay representa BYOF na Aruba lo ta Cassius Rosario, Richmend Anthony, Jeremy Pikerie, Jorge Gonzalez y Caroline Porras.

E team di media di BYOF media tambe lo biaha cu e grupo pa documenta e presentacion y mas. BYOF media ta representa pa David Martinus y Angelo Alberto.

Director di BYOF, Dennis Martinus ta sumamente contento cu por brinda e hobennan di BYOF Arts e oportunidad aki pa nan por sigui crece y amplia nan horizonte. Regularmente lo sigi saca e hobennan for di Boneiro pa haci e tipo di intercambionan aki, cu ta yudanan den nan desaroyo. Nos ta desea e team di BYOF Arts tur clase di exito na hermana isla Aruba.

Top