CITGO Aruba ta tuma paso crucial cu comienso di trabou di inspeccion

Diabierna ultimo dia 1 di september CITGO Aruba Refinery a inicia trabounan detaya di inspeccion den planta, un paso crucial cu CITGO Aruba y su partnernan a bin ta traha p’e durante e ultimo lunanan. E contratista principal pa e inspeccion ta YTT, cu ta un consorcio forma pa Technip France y Y&V Ingeniería & Construcción.

 

Desde cu a firma e Acuerdo di Servicio di Constratista Principal riba juni 15 e partnernan den e proyecto cu ta inclui CITGO Aruba Refinery, CITGO Project Management Team, e consorcio YTT y demas contratista y subcontratista local ta trahando duro pa completa e planificacion y preparativonan necesario pa logra e paso crucial aki.

 

“E anuncio cu e proyecto aki ta sigui mane planea ta excitante pa CITGO Aruba y nos partners”, asina Jose Pereira, Presidente den Funcion y CEO di CITGO Petroleum Corporation, y Director di CITGO Aruba Holding, LLC. a bisa.

“Awor e servicionan di subcontratista pa CITGO Aruba ta cuminsa. Esaki lo sigura cu nos lo drenta e siguiente fase di e proyecto na un manera exitoso den cua nos mester keda duna e miho di nos mes pa sigura e miho procesonan y e teamnan cu mas capabilidad.

Tambe t’asina cu nos ta compromete nos mes na ehecucion di cada fase di e proyecto na e manera mas socialmente responsabel”, sr. Pereira a bisa.

 

E fase inicial aki lo encera, ademas di trabounan di inspeccion, trabounan di reparacion riba ekipo cu prioridad halto, percura pa order e items cu tempo largo di entrega, como tambe ehecucion di partinan inicial di varios proyecto di inversion grandi y di medio ambiente pa e rehabilitacion y startup di e refineria pa produci crudo mehora. Inspeccion lo percura tambe pa informacion detaya pa sigui specifica y finalisa e descripcion di proyecto y e presupuesto di Clase II.

 

Representante di Consorcio y Director di Projecto di YTT, Alejandro Carvallo a bisa cu e refineria ta un parti integral di e isla cu a trece crecemento y beneficio pa e pueblo di Aruba desde su inauguracion na 1929.

“E la wordo cera parcialmente 5 aña pasa y awor e ta wordo rehabilita pa wordo opera como mehorador di crudo pa procesa crudo pisa. E Acuerdo di Servicio di Constratista Principal pa e proyecto di mehorador di CITGO Aruba Refinery su meta ta pa percura pa e servicionan cualifica di ingenieria, compra, maneho di proyecto y di subcontratista rekeri pa e descripcion di trabou di e rehabilitacion di e refineria”, sr. Carvallo a bisa.

 

Cada dia tin mas progreso y nos ta mas cerca di e reactivacion completo di CITGO Aruba Refinery. Na momento cu e ta operacional e expectativa ta cu e facilidad lo trece varios beneficio socio-economico pa Aruba. Ya caba e facilidad ta emplea alrededor di 500 persona, incluyendo empleado di CITGO Aruba Refinery y contratista, y e number aki lo sigui crece constantemente den e siguiente siman- y lunanan nos dilanti cu progreso di e proyecto.

Top