Ciudadano cu a maltratá un otro a pidi pa no mencioná su nòmber den medionan di prensa

WILLEMSTAD – Ya na cuminsamento di tratamento di un caso dialuna último den Corte un ciudadano di inicial S.G. a pidi su abogado cana pasa serca tur e representantenan di medionan di prensa presente, pidiendo masha pa no mencioná su nòmber den e relatonan cu lo sali publicá durante e dianan aki.

Despues di a maltratá un otro ciudadano, Polis a bay arest’é te na su pia di trabou y pa tal motibo el a keda retirá casi mesora y awor cu e tin un otro trabou e ta teme cu mencionando su nòmber den publicidad relacioná cu e acto castigabel cu el a cometé lo e por bolbe pèrdè trabou.

 

Tabata dia 25 di maart 2017 cu dos ruman di fam Griejaloe tabatin un problema cu otro cu a escala den un bringamento, pero tabata dia 2 di april 2017 cu e ciudadano S.G. di 36 aña di edad, despues cu e dos rumannan a bringa cu otro a dicidí di hinca su mes den e problema.

El a presentá den auto di un di e rumannan, cana baha for di e auto pa regla cuenta cu e otro ruman.

Rumornan inistente ta bisa cu e hòmber hasta tabatin un arma di candela den su man. Pero di tur manera a resultá cu e acusado aki, esta S.G. a dal e víctima riba su cabes, tumba largo abou na suela anto siendo abou na suela S.G. ainda a sigui bati e víctima cu skòp.

 

Pa cuminsá e acusado S.G. lo a dal e víctima di fam Griejaloe (P.G) den cabes y den cara cu moketa kibra lip, con tal partiendo moketanan formalmente na curpa di ruman Griejaloe, pa despues batié cu skòp cu su sapatu bistí, ocasionando vários otro lesion mas.

E víctima P.G., kende tabata presente den sala di Corte den compania di su señora a pidi daño y perhuicio y mas aleu a bin dilanti cu siendo abou na suela ricibiendo slanan di S.G., e víctima a lastra abou na suela y drenta bou di un vehículo cu tabata n’e sitio.

 

Pa un parti e historia ta core cu S.G. a hinka su mes den un diferencia di opinion entre dos ruman y asina ey a cumpra e guera pe. Cu arma di candela den man S.G., despues di a bati e víctima a grita: “Cua cu bin ta haña”.

Mester constatá cu declaracionnan di e dos rumannan finalmente no tabata na fabor di S.G., pasobra a bin dilanti cu ta S.G. a presentá n’e sitio, baha for di e auto y bay bati e ruman di inicial P.G. mal batí. Di otro banda S.G. ta pretendé cu ta P.G a menasá di dal e cu bòter.

 

E víctima Griejaloe, kende t’esun cu a haña bastante sla y claramente a keda maltratá, segun declaracion di dòkter tabata bou di influencia di alcohòl, pero el a nenga esaki redondamente den sala di Corte dialuna último.

Ademas Griejaloe tabatin vários declaracion contradictorio, esta cu el a bay for di dje y no sa precies kico a sosodé cuné, pero ey mes a bisa di a mira S.G. saca un arma di candela, despues di a caba di batié, gritando den direccion di esnan presente.

 

Huez señora Paulides na cierto momento a laga Griejaloe hura pa contestá algun pregunta.  Enfin, e declaracionnan aki hunto finalmente a surgi na desbentaha di e víctima Griejaloe.

E víctima a declará cu e no tabata bou di influencia di alcohòl, ya cu el a caba di sali Bándabou cue piscá, para na un toko Chines pa despues mira e Jeep di su ruman presentá n’e sitio, for di cua S.G. a baha bin batié.

Ademas Polisnan a constatá ku S.G., tambe tabata heridá, ilustrando cu e víctima tambe lo a dal S.G.

Huez a rechasá e daño y perhuicio di e víctima Griejaloe cu tabata stipulá n’e suma di 5310 florin.

Tambe a bin dilanti ku S.G. den pasado caba tabata den man di husticia, na aña 2004 el a keda condená na 8 aña di castigo di prizon pa abuso sexual, siendo despues tambe e tabatin un condena pa pocesion ilegal di arma di candela.

 

P’e caso di maltrato S.G. a cay 28 dia será. E sentencia final a bira 68 dia di prizon di cua 60 dia condicional, deskitando e periodo den aresto preventivo, anto cu un periodo di prueba di 2 aña.

E daño y perhuicio no a keda honrá, ya cu Huez no a considerá S.G. culpabel, pasobra posiblemente e víctima mes tambe a yuda ocasioná loke a sosodé.

Leave a Reply

Top