Ciudadano di Montaña practicando cultivo di mata den forma sostenibel

Cada bes mas y mas ciudadano ta cuminsa pone den practica nan pensamento di sostenibilidad, kisas no den forma grandi pero sin duda contribuyendo pa crea un miho mundo pa e siguiente generacion.

 

Durante e bishita di Accion di Bario den Montaña Prome Minister Mike Eman a topa cu sra. Petra Eduardo, kende a duna un bunita ehempel con tur hende por haci algo chikito riba tereno di sostenibilidad.

 

“Bishitando e casnan cada bes bo ta haya bunita ehempel di ciudadanonan consciente, ciudadanonan cu ta contribui na haci Aruba sostenibel, berde y bunita. Sra. Petra ta un bunita ehempel di e pensamento ak”, Prome Minister Eman a expresa na cas di famia Eduardo.

 

Sra. Petra Eduardo a mustra Prome Minister Eman con el a laga traha un goot, manera cu e casnan di antes tabatin, cu ta transporta e awa di yobida pa un bari. E señora a demostra di ta hopi consciente, pasobra e bari di awa aki ta bon tapa cu un serbette y mara pa evita cu sanguranan ta drenta den dj’e. Personal di GKMB a haci un control y tabata masha satisfecho cu e medidanan di proteccion cu e ciudadano aki ta tuma pa evita cu sanguranan ta pone webo den e awa.

 

Prome Minister a duna un demostra tirando “abate” den awa cu ta yuda evita reproduccion di sanguranan. E tipo di awa aki e expertonan di GKMB a splica no ta bon pa consumo humano tampoco pa bestia. E señora ta uza e awa aki pa muha su matanan y su orkideanan.

E ta hopi consciente con pa proteha y uza e awa di yobida cu e ta recoge. GKMB a bisa tambe cu nan ta uzando hopi insecticida “green” cu ta agradabel pa medio ambiente.

Top