Ciudadanonan ta aplaudi vision di Gobierno pa crea Centro Historico y Centro di Gobernacion

Plaza Padu t’e punto culminante cu a sera un serie di proyecto cu a ensera renobacion di centro di ciudad, incluso e parti cu ta wordo yama Centro di Gobernacion.

Na inicio kisas hopi hende no tabata consciente di e plan completo di Gabinete Mike Eman I y II, pero aworaki cu e trabou ta finalisa, por haya un mihor imagen di loke t’e vision di e Gobierno lidera pa Prome Minister Mike Eman.

 

E artista Ruthy Vrieswijk, kende tabata presente riba Plaza Padu durante e inauguracion siman pasa, tabatin hopi elogio p’e show cu a wordo hinca den otro pa honra Padu, su idolo, cu kende el a logra saca varios potret e anochi.

E anochi tabata uno yena di emocion, principalmente na momento cu e pianista di renombre internacional Raul di Blasio a subi escenario.

 

“Principalmente ora cu mi a scuche toca cancion di Padu.” E artistanan local tambe a sobresali, manera esun presenta pa Victor Samuel.

Sra. Ruthy Vrieswijk a skirbi diferente poema dedica na Padu, ya cu e ta kere cu na bida t’e mihor momento pa duna reconocemento na un persona.

“Pero awe nochi mi a bin simplemente pa duna un homenahe na Padu, pasobra nos ta stim’e inmensamente.

Mi no tin palabra pa bisa, pero e tabata un anochi sublime y historico.

Tambe e artista a expresa su admiracion p’e trabou cu Gobierno a realisa pa cu e area di Bestuurskantoor y centro di ciudad.

 

Centro di ciudad y centro di Gobernacion a keda “fantastico” y el a admiti cu na inicio e tabatin un poco problema cu introduccion di tram den centro di ciudad.

“E tram tabata sintami un poco dwars dor cu no tabata por a pasa cu auto mas den caya. Pero mi tin cu bisa cu e centro a keda bunita.

E arkitectura di Aruba ta briyando. Mi no por bisa otro cu Gobierno ta haciendo un bon trabou. Hopi cos a wordo haci y logra,”e artista a expresa.

 

Pa agrega cu Aruba tin un bon Prome Minister, un bon Gobierno y e ta apoye “all the way”. “Tin hende no ta wak e progreso y ta keda pega den pasado. Nan mester wak e progreso y e bienestar di henter e isla, di tur nos hendenan.”

Ademas di artistanan cu a duna presentacion riba e anochi dedica na Padu, pueblo di Aruba tambe tabata presente pa disfruta di e show y cumpli cu e meta “Hunto pa Padu”.

 

Josephine Dirksz a haya e show un “experencia grandi. Ora cu nan tabata toca e cantica di Padu, mi a haya kippevel.

Ta increibel pa bo tin bo dilanti un di e personanan cu a skirbi e himno nacional y cu bo por honre, dun’e su balor.

Bo ta mira con Arubianonan ta uni y apoya otro, esey ta great.”

E forma con a incorpora e Centro Historico y Centro di Gobernacion, unda cu monumentonan ta hunto ta impresiona Josephine Dirksz.

“Esaki ta algo cu nos como Arubiano mester ta orguyoso di dje, y e ta algo importante pa un pais tin.”

Pa hopi hende e hecho cu no solamente Padu, un di e autornan di himno nacional, ta na bida ta algo grandi, pero tambe e hecho cu e tabata presente riba e Plaza dedica na dje y cu nan por a mire di cerca.

 

Padu tin 96 aña y apesar di su salud tabata consciente di tur e trabou duro cu a wordo haci pa honre den un forma asina grandi. Esaki tambe t’e motibo di hopi emocion pa Gino Goeloe, Director di Wit Gele Kruis.

“Ora cu bo kier reconoce un persona, bo mester haci’e na bida. E plaza aki ta algo inolvidabel pa mi persona sigur y p’e generacionnan cu ta bin.

Nos por ta orguyoso di dje. Unda cu mi bay mi ta papia bon di mi pais. Esaki ta loke cu a resalta den presentacion di e musico y cantantenan cu a presenta awe nochi,” Goeloe a bisa na final di e ceremonia.

 

El a felicita pueblo di Aruba, pasobra e plaza aki ta unico den Caribe, dedica na un musico manera Padu, un persona multifacetico.

E concepto di renoba e centro historico tambe a haya elogio di Goeloe, ya cu esaki ta algo cu esnan pafo no ta pensa mucho riba dje.

Pero e ta algo importante pa un pais, pa dedica tempo na historia di bo pais.

“E idea aki cu Gobierno a bini cune ta algo tremendo. Bo mester ta un visionario pa mira algo asina. Bo tin tur cos rond di e plasa aki.

Pabien na Arkitecto Raffy Kock. Ban sigui cu e vision aki di Aruba. Aruba ta un ehempel pa hopi pais.”

 

Top