Claridad y seguridad a yega na Tanki Leendert cu Luz den Bario

Diahuebs anochi, apenas momentonan despues cu a yega for di Colombia, Prome Minister Mike Eman a bay na Tanki Leendert pa instala e prome di varios luz cu ta bin den e bicindario como parti di programa ‘Luz den Bario.’

Un grupo grandi di bisiña tabata presente y ansioso pa e momento grandi. Algun di nan, cu ta experencia e momento aki despues di tin 20 aña bibando sin luz den e bicindario.

Den un ambiente masha ameno y di alegria, a celebra yegada di claridad y seguridad den bario.

 

Minister Presidente Mike Eman a splica cu ta hustamente canando mey mey di e ciudadanonan den e bario, “ta haya sa di e deseo, pero tambe e reclamonan y ta lucha pa yega ne luznan aki.” Pero den e caso particular di Tanki Leendert, Premier Eman a bisa cu adicionalmente e tabatin tres Parlamentario cu tur dia ta yam’e pa puntra ki dia Tanki leendert ta haya luz.

E ta referi na Parlamentarionan Norman Roos, Jennifer Arends Reyes y Jeffrey Kelly.

 

Reconociendo e grupo di bisiña reuni, Minister President Eman a expresa cu e ta wak “un bario completo contento. Esaki tanifica pa nos cu nos por a cumpli cu e necesidad di un bario, su casnan y su hendenan.

E resultado ta esfuersonan conhunto di Minister di Energia Mike de Meza, Minister di Infrastructura Benny Sevinger, Utilities Aruba N.V., Elmar Aruba N.V. y tambe DTI, tur bou coordinacion di Haime Vingal di oficina di BoBario cu ta resort bou Ministerio di Asuntonan General, Ciencia, Innovacion, Desaroyo Duradera, Cultural Sector Primario.

 

“E trabou no ta completo”, asina Premier Eman mes a bisa, señalando cu ainda falta asfalt.

“Nos ta realisa cu tur esey ta loke ta haci un bario completo.” Mientras tanto bisiñanan por disfruta un poco mas di e ambiente rond di nan cas, como tambe e seguridad.

“Esey ta locual nos kier, un calidad di bida pa nos hendenan. Unda cu nos tin cu traha y duna di nos mes pa esey wordo relaisa, nos ta haci esey sin descanso. Asina e trabou ta sigui pa nos pais por sigui progresa”, e mandatario a finalisa bisando.

 

‘Luz den Bario’ ta un programa cu tur siman ta den otro bario di nos islando puntonan di luz publico cu tecnologia LED. Te cu awor aki Luz den Bario a percura pa caya y sectornan cu nunca prome a conoce iluminacion, awo ta goza di sinti di trankilidad y mas cohesion.

Montaña, Seroe Biento y De Vuyst ta djis algun di e cantidad grandi cu a keda beneficia pa ‘Luz den Bario’ caba.

Top