Clarisca Velasquez (AVP) den reunion na Angochi: Semper nos a scucha y traha pa pueblo

Durante e encuentro politico cu AVP a tene na Angochi tabata presente diferente candidato di partido berde. Den un encuentro cu e habitantenan, a papia di tur e proyectonan cu a wordo realisa caba, y tur loke cu ta den ehecucion. Pero tambe e motibonan pakico AVP mester haya e apoyo di pueblo pa sigui cu e bon trabou cu a bin ta haciendo.

 

Den su presentacion na e habitantenan presente, Clarisca Velasquez a splica cu ta masha importante pa scucha e pueblo, pasobra “scuchando pueblo, nos a haci e trabou e ultimo 8 añanan. Nos kier sigui scucha boso pasobra nos kier continua cu e trabou”, el a bisa.

E tipo di encuentronan aki, e candidato a bisa, ta un bon momento pa sa tur kico e habitantenan kier of si nan tin pregunta, pa haci esaki tambe.

 

Tambe el a bisa cu tur e candidatonan ta hopi orguyoso di Mike Eman, cu no ta solamente nan lider pero ta guia nan den tur asunto. Asina bou guia di e lider a logra drenta Santa Cruz e ultimo campaña y awor ta sigui busca confiansa di e habitantenan pa sigui cu e trabou cu a bin ta haciendo. Asina el a splica tambe di e. o. leynan di trafico cu e siman aki a pasa den Parlamento, con e Gobierno desde 2009 a bin ta enfocando riba e ser humano ora cu e economia tabata -15.

 

Pero tambe a repasa otro logronan, maner reparatie-toeslag; mamanan soltero a haya un suma extra y onderstand a subi cu 25% mientras cu a introduci pensioen obligatorio. No solamente e sector ey a wordo mehora, pero tambe e empleadonan publico.

Despues di tur esey, a concentra riba desaroyo di producto Aruba y a mehora e infrastructura, creando e linear park cu a pone Aruba move, tanto grandi como chikito.

“Proyectonan cu tabatin 30 aña para, Gobierno a logra ehecuta nan, manera hospital, containerhaven, Green Corridor, y Watty Vos Blvd. Cuatro proyecto den un periodo danki na Mike Eman y su Gobierno”, Velasquez a bisa.

 

E candidato, y Parlamentario, a bisa cu e lo ta bishitando Angochi hunto cu su team pa haya e apoyo necesario den e eleccionnan di 22 di september awor.

Top